ABŞ Nümayəndələr Palatasının Nəzarət Komitəsi milyarder Ceffri Epşteynin istintaqı ilə bağlı Baş Prokuror Pam Bondinin Konqres qarşısında ifadə verməsi üçün çağırılması barədə qərar qəbul edib.
AZXEBER.COM xəbər verir ki, bu barədə ABC News məlumat yayıb.
Məlumata görə, qərar Respublikaçı Nümayəndə Nensi Meysin təqdim etdiyi təklifdən sonra keçirilən səsvermə nəticəsində qəbul olunub.
Meys ABŞ-də fəaliyyət göstərən X sosial media platformasında paylaşım edərək Bondini Konqres qarşısında ifadə vermək üçün çağıracağını bildirib.
O qeyd edib ki, Bondi Epşteyn işi ilə bağlı bütün sənədlərin ictimaiyyətə açıqladığını iddia etsə də, mövcud qeydlər bunun əksini göstərir.
Meys bildirib ki, "Epşteyn işi ABŞ tarixində ən böyük ört-basdır əməliyyatlarından biridir”.
Onun sözlərinə görə, 3 milyondan çox sənəd paylaşılmasına baxmayaraq, tam həqiqət hələ də məlum deyil və bəzi şəkillər, səs yazıları və giriş transkriptləri hələ də açıqlanmayıb.
Meys əlavə edib ki, "Ədliyyə Nazirliyinin ədalətin təmin edilməsindən daha çox güclü şəxslərin qorunmasına üstünlük verməsinin səbəbini bilmək istəyirik”.
