Rusiyanın Avropa İttifaqı ölkələrindən birinə mümkün hücumu ssenarisi hazırda nəzərdən keçirilir və NATO-da ciddi narahatlıq yaradır.
Bu barədə "Radio NV"nin efirində NATO Hərbi Komitəsinin sədri, admiral Rob Bauer analitik proqnozlarla bağlı suala cavab verərkən bildirib.
Proqnozlara görə, Rusiya Aİ ölkələrindən birinə hücum edərək Avropa İttifaqı ərazisində yeni cəbhə aça bilər.
"Bu ehtimala inanıram, lakin bu, Ukrayna ilə bağlı deyil, Çinlə bağlıdır. NATO-nu ciddi narahat edən ssenari ondan ibarətdir ki, əgər Çin Rusiya ilə əlaqələrini gücləndirərsə və Tayvan ətrafında vəziyyət kəskinləşərsə, onların maraqlarına uyğun olaraq Rusiyanın müttəfiqlərdən birinə hücum etməsi çox faydalı ola bilər", deyə o qeyd edib.
Admiral izah edib ki, belə bir vəziyyətdə ABŞ iki cəbhədə müharibə aparmaq məcburiyyətində qala bilər: bir cəbhə Avropada, digəri isə Uzaq Şərqdə, Asiya-Sakit okean regionunda.
Bauerin sözlərinə görə, bu ssenari hazırda müzakirə olunur və NATO-da ciddi narahatlıq doğurur.
"Bu halda Çin NATO ilə müharibə aparmayacaq, lakin Rusiya aparacaq. Rusiya getdikcə Çinin təsir dairəsinə düşdüyü üçün, çox güman ki, bunu etməli olacaq, əks halda Çinin dəstəyi, məsələn, Ukrayna məsələsində dayandırıla bilər. Bəli, hesab edirəm ki, bu, çox narahatedici ssenaridir", deyə o xəbərdarlıq edib.
