Azərbaycan millisində daha bir türkəsilli futbolçu top qova bilər.
Komanda.az xəbər verir ki, bu ilin yanvarında “Trabzonspor”dan “Bursaspor”a transfer edilən qürbətçi futbolçu Dəniz Yılmaz millimizdən təklif alıb. Bu haqda Türkiyə mətbuatı xəbər yayıb.
“Anadolu” agentliyinə açıqlama verən futbolçunun meneceri Erdem Karagöl ötən mövsümün ikinci yarısında vurduğu qollar və sərgilədiyi futbolla diqqət mərkəzinə düşən müştərisinin adının AÇ-2016-ya yollanan heyətə salınması variantının da olduğunu bildirib:
“Dəniz ilkin heyətə çağırılacağını gözləyirdi. Ancaq heyətdən kənarda qaldı və çox üzüldü”.
Karagöl Dəniz Yılmaz üçün Azərbaycan Futbol Federasiyasından (AFFA) təklif aldıqlarını da vurğulayıb. Hətta o, futbolçunun bu təklifə təəccübləndiyini də gizlətməyib.
Almaniyada doğulan Dəniz daha əvvəl bu ölkənin və Türkiyə millisinin formasını geyinmədiyi üçün Azərbaycandan gələn təklifə yox deməyib. Yaxın günlərdə onun dəqiq qərar verəcəyi gözlənilir.
