Azərbaycan Gənclərinin Avropaya İnteqrasiyası Təşkilatı (AGAT) AR Prezidenti yanında QHT-lərə Dövlət Dəstəyi Şurasının və Azərbaycan Respublikasının Böyük Britaniya və Şimali İrlandiya Birləşmiş Krallığındakı Səfirliyinin dəstəyi ilə London şəhərində “Azərbaycanın Avropaya İnteqrasiyası Modeli” mövzusunda Forum təşkil edəcəkdir.
AGAT-dan AZXEBER.COM-a verilən məlumata görə, Azərbaycan reallıqlarının aşılanmasına həsr olunmuş bu tədbir 23 oktyabr 2013-cü il tarixində günün birinci yarısında (saat 10.00) London şəhərində yerləşən Kral Coğrafiya Cəmiyyətinin (Royal Geographic Society) binasında keçiriləcəkdir.
Forumda Azərbaycan Respublikasının Böyük Britaniya və Şimali İrlandiya Birləşmiş Krallığındakı Səfiri Fəxrəddin Qurbanov, AR Prezidenti yanında Strateji Araşdırmalar Mərkəzinin (AR SAM) Xarici siyasət məsələlərinin təhlili şöbəsinin müdiri Rövşən İbrahimov, SAM-ın aparıcı elmi işçisi, enerji üzrə ekspert Gülmira Rzayeva və AR Rabitə və İnformasiya Texnologiyaları Nazirliyinin “TASİM/EuroCA” layihəsinin aparıcı mütəxəssisi Səbinə Həsənova çıxış edəcəkdir.
Forum zamanı məruzəçilər tərəfindən tədbir iştirakçılarına ölkəmizin son illər ərzində uğurlu inkişafı, Avropa İttifaqı ilə qarşılıqlı münasibətlərinin dinamikası, bu sahədə əldə olunmuş nailiyyətlər və Azərbaycan-Aİ əməkdaşlığının genişləndirilməsinin potensialı və problemləri haqqında geniş məlumat verilməsi nəzərdə tutulur.
Tədbirdə əsasən Böyük Britaniya ictimaiyyəti nümayəndələrinin, o cümlədən regionumuza maraq göstərən ekspertlərin, gənc fəalların, işgüzar dairələrin, QHT-lərin və Londonda akkreditə olunmuş diplomatik korpusun təmsilçilərinin iştirakı gözlənilir.
