Aldığınız maşın xarab çıxsa, pulunuzu geri tələb edə bilərsiniz - Vəkil açıqladı

SOSİAL

00:43 02.06.2026

656

Maşın-alqı satqısı zamanı alıcılar bəzən gözlənilməz texniki nasazlıqlarla qarşılaşırlar. Belə hallarda tərəflər arasında yaranan mübahisələr yalnız müqavilə münasibətləri ilə deyil, həm də istehlakçı hüquqları ilə tənzimlənir. Alıcının əsas hüquqları arasında keyfiyyətli mal tələb etmək, aşkar qüsurların aradan qaldırılmasını istəmək və ya müqavilənin ləğvini tələb etmək kimi imkanlar yer alır. Bu hüquqlar satıcı ilə münasibətlərdə balansın qorunmasına necə xidmət edir?

Mövzu ilə bağlı vəkil Cavanşir Qasımzadə Demokrat.az-a bildirib ki, mülki Məcəllənin müddəalarına əsasən maşın alqı satqısı zamanı malın lazımi keyfiyyətdə olması mühüm şərtdir:

"Əgər alıcı avtomobildə ciddi bir texniki problem aşkar edərsə, qanunvericilik onun hüquqlarını qoruyur və ona fərqli seçimlər verir. Mülki Məcəllənin 421-ci maddəsinə görə müqavilə şərtlərinin əsaslı surətdə dəyişməsi və ya öhdəliklərin pozulması zamanı tərəflər müqaviləyə xitam verilməsini istəyə bilər. Alıcı satıcıdan maşının qüsurunun ağlabatan müddətdə pulsuz aradan qaldırılmasını və ya təmir üçün çəkilən xərclərin əvəzinin ödənilməsini tələb edə bilər. Əgər nasazlıq böyükdürsə və maşından tam istifadə etmək mümkün deyilsə, alıcı satış qiymətinin mütənasib şəkildə azaldılmasını da tələb edə bilər.

Bundan başqa alıcının maşını eyni keyfiyyətdə və qüsursuz olan digər bir avtomobillə dəyişdirmək hüququ da var. Əgər satıcı gizli qüsurlar barədə alıcını qabaqcadan məlumatlandırmayıbsa, alıcı müqaviləni ləğv edib ödədiyi pulun tam geri qaytarılmasını tələb edə bilər. Bu hüquqları icra etmək üçün həmin problemlərin alqı satqı anında mövcud olduğunu rəsmi ekspertiz rəyi ilə sübut etmək mütləqdir",- deyə vəkil qeyd edib.

Təcrübədə bir çox sürücü alqı-satqıdan dərhal sonra servis xidmətlərinə müraciət edərək aldadıldığını öyrənir. Motor, sürətlər qutusu və ya kuzovdakı ciddi qüsurların gizlədilməsi qarşı tərəfə məhkəmə yolu ilə kompensasiya tələb etmək əsası verir. Qanunvericilik mexanizmi satıcıların avtomobilin real vəziyyəti barədə dürüst məlumat verməsini məcburi edərək bazarda ədalətli balans yaradır. Hüquqi addımlar atmadan əvvəl isə mütləq şəkildə texniki rəy tələb olunur.

Yəni, maşın aldıqdan sonra gizli qüsur tapılarsa, alıcı təmiri, qiymətin endirilməsini və ya müqaviləni ləğv edib pulun tam qaytarılmasını tələb edə bilər.