ANS prezidentinin müavini Mais Məmmədov isə "Yeni Müsavat"a açıqlamasında bu xəbərləri böyütməyin əleyhinə olduğunu dedi. Onun sözlərinə görə, yaradıcı mühitdə, iş dünyasında istefalar da, yeni işə qəbul olmalar da tamamilə adi haldır. Müsahibimiz adətən xanım işçilərin ailə həyatı quranda, analıq məzuniyyətinə çıxanda işdən ayrılmasının, kişi əməkdaşların isə öz karyerasını başqa yerdə davam etdirmək üçün çıxmasının normal hal olduğunu vurğuladı: “İşdir, kollektivdir, kimsə kiminləsə dalaşır, kiməsə daha sərfəli yerdə iş təklifi gəlir və çıxır. Bunu niyə böyüdürsünüz ki? Mən özüm 30 il Moskvanın müxbiri olmuşam, sonra da ərizə yazıb, işdən çıxmışam. Dəfələrlə xahiş ediblər ki, geri qayıdım, amma qayıtmamışam. Jurnalist bu gün burda işləyir, sabah başqa yerdə. Bundan adi nə var?”
Ancaq apardığımız araşdırma nəticəsində məlum olub ki, şirkətdə böyük narazılıqlar baş qaldırıb. Bu narazılıqlar əsasən teleşirkət rəhbərliyinin düzgün olmayan siyasətinin nəticəsi olaraq ortaya çıxıb. Özlərinə qarşı haqsızlıqlara dözməyən ANS-çilər getmək qərarına gəlib. Əvvəlcə 25-dək əməkdaş şirkəti tərk etmək üçün müraciət edib. Onlardan bəzilərini güc-bəla ilə geri qaytarmaq mümkün olsa da bəziləri istefalarında israr edib. Yaxın günlərdə həmin işçilərin də istefası gözlənilir.
