Azərbaycanın internet məkanında bir neçə gün sonra fəaliyyətə başlayacaq APA TV-də hazırlıq işlər yekunlaşmaq üzrədir.
“APA Holdinqin” yeni televiziya layihəsi olan APA TV xəbər buraxılışlarıyla, yeni formatda hazırlanan verilişləri ilə indidən böyük marağa səbəb olub, internet televiziyanın süjetləri cəmiyyətdə rezonans doğurub.
Bəs APA TV Azərbaycan internet televiziya məkanında nə kimi yeniliklərə səbəb olacaq və ümumilikdə televiziyadan gözləntilər nədir?
AZXEBER.COM portalı mövzuyla əlaqədar ictimai-siyasi xadimlərin fikrini öyrənib.Tanınmış teleaparıcı Anar Yusifoğlu APA TV-nin internet televiziya məkanında böyük işlər görəcəyinə əmin olduğunu bildirib:
“Onlayn medianın informasiyaya münasibəti dəyişir. Xəbər agentlikləri arasında öz operativliyi və dəqiqliyi ilə seçilən və internet mediaya özünəməxsus yeniliklər gətirən APA artıq yazıdan görüntüyə keçir. Şübhəsiz ki, Azərbaycanda indiyə qədər də internet televiziyaları vardı. Amma bu müddət ərzində internet televiziyasının uğurundan danışmaq bir o qədər də inandırıcı görünmürdü. Şübhəsiz ki, bu işdə peşəkar kadr potensialı, müasir texniki avadanlıq və işgüzarlıqla yanaşılarsa internet televiziyasının ənənəvi televiziyalardan üstünlükləri çoxdur. Ona görə də APA TV-nin uğur qazanacağına inanıram. Çünki APA TV fərqlidir və bu TV-ni yaradanların öz işlərinə olan münasibəti də fərqlidir. APA TV-nin sınaq xəbər buraxılışlarını izləyirəm. Təbii ki, bəzi texniki qusurlar gözə dəyir, amma bunları ciddi qusur saymıram. APA TV-nin xəbər düzümü, aparıcının danışmağa üstünlük verməsi, günün reportajı maraqlı yanaşmadı. Bu gün oxucu xəbəri oxumaqdan çox görmək, eşitmək istəyir. İlk buraxılışları izlədikdən sonra düşünürəm ki, APA TV seyrçinin etibarını qazanacaq və auditoriya formalaşdırarkən özünə inam oyatmağı bacaracaq. Bu gün tamaşaçı onun marağına xidmət edən televiziyanı qəbul edir, ona inanır və izləyir. Təbii ki, APA-da dəqiqlik operativlikdən öndədir, sensasiya yaratmaq üçün ədaləti pozmurlar və öz prinsiplərinə sadiq qalırlar”.
Böyük Quruluş Partiyasının sədri, millət vəkili Fazil Mustafa “APA Holdingin” yeni layihəsi olan APA TV-nin peşəkar kollektivlə böyük işlər görəcəyini söyləyib:
“APA TV hazırda çox peşəkar kollektiv ilə böyük işin başlanğıcını qoyub. Mən onların bir neçə proqramında da olmuşam. Müasir texniki avadanlıqlarla və peşəkar kollektivlə APA TV-nin böyük işlər görəcəyinə əminəm. Çünki APA-nın özü xəbər agentliyi kimi Azərbaycan mətbuatında öz operativliyi və dəqiqliyi ilə seçilir. Təbii ki, televiziya da eyni qaydada böyük uğur əldə edəcək. Mən də APA TV-nin kollektivinə uğurlar arzu edirəm”.
Millət vəkili Ceyhun Osmanlı da “APA Holding”in yeni layihəsini yüksək qiymətləndirib:
“Mən APA TV-nin Azərbaycanın milli televiziya məkanında özünəməxsus yer tutacağına əminəm. APA TV öz peşəkar kollektivi ilə artıq böyük marağa səbəb olub və əminəm ki, öz verilişləri ilə də geniş tamaşaçı auditoriyasını öz ətrafında birləşdirə biləcək. Televiziyanın bütün kollektivinə uğurlar arzu edirəm”. AZXEBER.COM xəbər portalı olaraq APA TV-yə uğurlar arzulayırıq. Əminik ki, APA brendi altında yaradılan növbəti qurum da böyük uğur qazanacaq!
Əfsələddin Ağalarov
