Türkiyənin məşhur LİV Hospital klinikasından daha bir uğurlu əməliyyatın sorağını aldıq. Bu dəfə Hospitalda aprel qazisi onurğasından əməliyyat olunaraq, ayağa qaldırıldı.
AZXEBER.COM xəbər verir ki, Aprel döyüşləri qazisi, baş leytenant Azər Arif oğlu Məmmədov 2016-cı il aprel döyüşlərində onurğasından yaralanıb, bu vaxta kimi 2 dəfə əməliyyat olunub. Heydər Əliyev fondunun dəstəyi və Healthis Assistance Şirkətinin rəhbəri Sənan Quliyevin təşkilatçılığı ilə bu ay LİV Hospitala gətirilib. Pasiyentə LİV Hospitalın kök hüceyrə nəqli üzrə Professor doktor Erdal Karaöz tərəfindən 2 kurs kök hüceyrə nəqli və Prof. Dr. Çağatay Öztürk tərəfindən onurğa əməliyyatı keçirilib. Hal-hazırda səhhəti çox yaxşıdır.
Hospitala gələndə əlil arabasında gəlmişdi, sağ tərəfdə və belində gücsüzlük, hissiyatsızlıq var idi. İndi tutaraq özü qalxır, dayanır, addımları daha yaxşıdır.
LİV Hospital Onurğa Cərrahiyyəsi bölümünün rəhbəri, Prof. Dr. Çağatay Öztürk pasiyentin özünün də əzmi ilə sərbəst, müstəqil gəzəcəyinə inanır:
" Sevgili Azərin əməliyyatını uğurla bitirdik. Çox ağır, talehsiz bir yaralanma keçirib. Əslində yaralandığı ilk andan bu vaxta kimi keçirdiyi müalicə və əməliyyatlar yerində olmuş, xəstənin nevroloji durumu düzəlmişdi. Lakin bir tərəfli gücsüzlük, tam yeriyə bilməməsinin səbəbini araşdırdıq. Əvvəl taxılmış implantlarda yetərsizlik aşkar etdik.
Sinir kanalını sıxışdıran çox sayda sümük parçalarını təmizlədik. Oturması, ayağa durması bundan sonra daha yaxşı olacaq. Azər bəyin bir hərbçi əzmi ilə bundan sonra daha yaxşı nəticələrə gələcəyini görürəm. Bu gün üçün hər şey bitmiş deyil. Müalicə, müşahidə və reabilitasiyamız davam edəcək”.
Aprel qazisinin müalicəsi ilə hospitalın rəhbəri Meri İstiroti, baş həkim Dr. Adil Tanık, baş həkim yardımçısı Dr. Halil Hüzmeli, Beynəlxalq şöbənin müdiri Dr. Fatih Akpınar birbaşa maraqlanıb, onu ziyarət ediblər.
