Azərbaycan Respublikası Dövlət Neft Şirkəti (ARDNŞ) yeni təqaüd proqramı elan edib. AZXEBER.COM-un şirkətin rəsmi saytına istinadən verdiyi məlumata görə, proqram çərçivəsində Rusiya Federasiyasının S.Makarov adına Dövlət Dənizçilik Akademiyasının bakalavr pilləsində və Fransanın qabaqcıl ali məktəblərində magistratura pilləsində təhsillərini davam etdirmək istəyən gənclər üçün müsabiqə keçiriləcək. Rusiyada təhsil almaq istəyən namizədlərə qoyulan tələblərə gəldikdə, Azərbaycan vətəndaşı olan, rus dilini yaxşı bilən, yaşı 25-dən yuxarı olmayan gənclər müsabiqədə iştirak edə bilərlər. Fransada təhsil almaq üçün isə müsabiqədə ingilis, yaxud fransız dilini yaxşı bilən, hazırda bakalavriatın IV kursunda və ya magistraturada oxuyan, həmçinin ali təhsilini başa vurmuş gənclər iştirak edə bilərlər. Namizədlər, həmçinin komissiyaya TOEFL, İELTS və s. xarici dil imtahanlarının verilməsi barədə sertifikatlar təqdim etməlidirlər.
