Avropa Şurası Azərbaycanda vəkillər və hüquq müdafiəçiləri üçün Avropa İnsan Hüquqları Konvensiyasının (AİHK) və Yenidən Baxılmış Avropa Sosial Xartiyasının (YBASX) tətbiqi ilə xüsusilə ayrı-seçkiliyin qadağan olunması standartları mövzusunda təlimçilər üçün təlim proqramına başlayıb.
AZXEBER.COM-a Avropa Şurasının Bakı ofisindən bildiriblər ki, dörd gün davam edəcək tədbir üç ayrı sessiya üzrə keçiriləcək.Təlimdə iştirak üçün 30 vəkil və hüquq müdafiəçisi dəvət olunub. Sessiyaların sonunda bu mütəxəssislər yekun test sorğusundan keçəcəklər və bundan sonra ayrı-seçkiliyi qadağan edən qanunvericilik üzrə xüsusi biliklərə malik 30 nəfərdən ibarət təlimçi qrupu təşkil edəcəklər.Onlar öz biliklərini digər vəkillər və hüquq müdafiəçiləri ilə paylaşacaq və iştirakçılara Azərbaycanda insan hüquqları standartlarının tətbiq edilməsi üzrə təlimlər keçəcəklər.Bu, Azərbaycan vəkillərinin və hüquq müdafiəçilərinin Avropa İnsan Hüquqları Məhkəməsinə daha yaxşı əsaslandırılmış ərizələr göndərməsini təmin edəcək.“Üzv dövlətlərin məhkəmə sistemlərinin inkişafı və hüquq sahəsində fəaliyyət göstərən mütəxəssislərin, xüsusilə vəkillərin və hüquq müdafiəçilərinin bacarıqlarının artırılması Avropa Şurasının əsas prioritetlərindən biridir.Bu sahədə müxtəlif tədbirlər həyata keçirilir. Bu birgə proqramın da məqsədi Azərbaycanda hüquqşünasların Avropa İnsan Hüquqları Konvensiyasının yurispridensiyası əsasında məhkəmə çəkişmələri aparma bacarıqlarının artırılmasına kömək etmək və Avropa İnsan Hüquqları Məhkəməsinə təqdim olunan ərizələrin keyfiyyətinin yaxşılaşdırılmasını təmin etməkdir” – deyə Avropa Şurasının Azərbaycandakı ofisinin rəhbər müavini Teymur Məlik-Aslanov bildirib.Azərbaycan Respublikası Ədliyyə Akademiyasının təmsilçisi Elçin Xələfov proqramı yüksək dəyərləndirərək bildirib:“Vəkillər üçün bu cür təlimçilər üçün təlim proqramları vacibdir və bu təlimləri keçən şəxslər sonradan Ədliyyə Akademiyasının keçirəcəyi təlim proqramlarına cəlb ediləcəklər”.Avropa İttifaqının Azərbaycandakı Nümayəndəliyinin təmsilçisi Miguel Magro isə bildirib ki, proqram, AŞ və Aİ-nin Azərbaycan hökuməti ilə birgə əməkdaşlığı çərçivəsində, şəxslərin insan hüquqlarının və fundamental azadlıqlarının müdafiəsinin inkişafı istiqamətində göstərdiyi əhəmiyyətli səydir.Tədbir, AŞ və Aİ-nin birgə həyata keçirdiyi “Avropa İnsan Hüquqları Konvensiyası və Yenidən Baxılmış Avropa Sosial Xartiyasının yerli səviyyədə icra olunması ilə bağlı vəkillərin və hüquq müdafiəçilərinin bacarıqlarının artırılması” layihəsi çərçivəsində həyata keçirilir.Bu, regional layihədir və 2013-2015-ci illərdə Azərbaycan, Ermənistan, Moldova, Gürcüstan, Rusiya və Ukraynada həyata keçirilir.
