Layihənin əsas məqsədi Azərbaycanda tələbə hüquqları bazasını Avropa təcrübəsinə uyğun olaraq fornalaşmasına dəstək olmaqdır. Layihə çərçivəsində bu yöndə bir sıra fəaliyyət istiqamətləri müəyyən edilmişdir. İlk növbədə 6 universitetdə tələbələr üçün “İdeal Tələbə Təşkilatı” modelində təlim proqramı keçiriləcəkdir. Təlim proqramı Avropa Tələbələr Birliyinin təcrübəsi əsasında formalaşaraq özündə tələbə təşkilatı fəlsəfəsini, onun strukturunu və gələcək fəaliyyət istiqamətini müəyyənləşdirmək üçün müxtəlif müzakirələrin təşkilini nəzərdə tutur. Layihənin digər mühüm fəaliyyətlərdən biri də Avropa Tələbə Hüquqları Nizamnaməsinin elektron variantda hazırlanmasıdır. 5 bölmə və 35 maddədən ibarət olan Nizamnamə bütün universitet rəhbərlikləri, tələbələr və dövlət qurumlarına təqdim edilərək ictimai müzakirəyə çıxarılacaqdır.

Bununla yanaşı Tələbə Hüquqları Nizamnaməsini hazırlayan tələbə ekspertlərdən biri Azərbaycana dəvət edilərək 5 günlük seminar və təlimlər təşkil ediləcəkdir.
Qeyd edək ki, layihənin icrası zamanı Avropa Tələbələr Birliyinin təcrübəsindən geniş istifadə ediləcəkdir. Bu layihə başlanğıc olaraq qəbul edilərək, Azərbaycanda tələbə hüquqlarının formalaşması və beynəlxalq standartlara uyğunlaşdırılması istiqamətində davam edəcəkdir.