Bu sözləri açıqlamasında Müasir Müsavat Partiyasının sədri Hafiz Hacıyev deyib. Onun sözlərinə görə, bu gün korrupsiyadan danışan məmurların özləri ən böyük korrupsionerlərdir: “Korrupsiyanın qarşısını almaq üçün birinci onları vəzifədən çıxarıb, həbs etmək lazımdır. Milləti də prezidentin üzərinə qaldıran onlardır. Əgər onlar vəzifədədirlərsə necə rüşvətin kökün kəsmək olar? Televiziyaya çıxıb deyirlər ki, rüşvət halları var. Buna kimə deyirlər? Əgər rüşvəti etiraf edirsənsə, sən vəzifədə nə gəzirsən?”.
Hafiz Hacıyevin sözlərinə görə, prezident İlham Əliyev belə çətin durumda vəziyyəti xalqın xeyrinə dəyişmək üçün çox cəhd göstərir: “Qardaş kimi sevdiyim prezident və xanımı hər addımda çalışır ki, bu ölkə üçün nəsə iş görsünlər. Mafioz məmurlar isə buna imkan vermirlər. Prezidentdə hər şeyin yaxşı olduğu haqqında yalan informasiyalar verib, onu camaatın gözündən salmağa çalışırlar. Baş prokuror Zakir Qaralov yaxşı dedi ki, birinci özlərindən başlamalıdırlar. Ola bilər Zakir Qaralov ya çaşıb, ya da duruxub deyib, amma düz deyib. Bunun üçün Nazirlər Kabineti təcili istefata getməlidir, əksər məmurlar həbs edilməlidir, Milli Məclis buraxılmalıdır. Onsuzda Milli Məclisin 2-3 ay ömrü qalıb. Mən hesab edirəm ki, parlament bu qədər təzyiqin qabağında duruş gətirə bilməyib, buraxılacaq”.
Partiya sədrinin sözlərinə görə bəlkə belə, Azərbaycana yaxınlaşan inqilab dalğasının qarşısını almaq olar: “Bu gün elə məmurlar var ki, məşuqəsinə 20 min dollara ətir alır ki, onun yanına gələndə yaxşı iy gəlsin. Elə məmurlar var 10 yerdə villaları var, elələri var ki, düşmən ölkədə biznes qurublar. Birinci bunlar getməlidir. Onlar İlham Əliyevə zərbə vurmağa çalışırlar. Ancaq mən Hafiz Hacıyev və Müasir Müsavat partiyası son ana qədər prezidenti müdafiə etməyə cəhd göstərəcəyik. İlham Əliyevi qorumalıyıq“. // QayNar.info
