Yolun qapanmış hissəsi avtomobillərin hərəkəti üçün çoxdan açılıb, amma yeraltı avtomobil dayanacağında işlər hələ başa çatmayıb.
AZXEBER.COM Day.Az-a istinadən bildirir ki, daimi oxucularımızdan olan Vüqar həmin dayanacağın nə zaman istifadəyə veriləcəyini soruşur.
Səbayıl rayon İcra Hakimiyyətinin şöbə müdiri İsrafil Kərimovun dediyinə görə, ikimərtəbəli yeraltı avtomobil dayanacağı təxminən 2 min avtomobil üçün hesablanıb. Hər mərtəbədə 1000 avtomobil saxlana bilər.
Layihəyə uyğun olaraq yeraltı avtomobil dayanacağının 8 giriş-çıxışı olacaq. Onların 2-si avtomobillər, 6-sı isə piyadalar üçündür.
"Hazırda yeraltı avtomobil dayanacağında intensiv işlər aparılır və onlar başa çatmaq mərhələsindədir. Yaxın bir-iki ayda dayanacaq istifadəyə veriləcək", - İ.Kərimov bildirib.
Yeraltı avtomobil dayanacağı əlahiddə elektrik yarımstansiyası, yanğınsöndürmə rezervuarı, avtomobillərin dəm qazlarının təmizləmə və ventilyasiya qurğuları ilə də təchiz olunub.
