I Azərbaycan-Alman Tibbi təlim kurslarının açılış mərasimi keçirilib
Azərbaycan-Almaniya Tibbi Əməkdaşlıq Cəmiyyəti, Azərbaycan Tibb Universiteti və “İRƏLİ” İctimai Birliyinin birgə təşkilatçılığı və Azərbaycan Gənclər Fondunun dəstəyi ilə Almaniyanın Haydelberg və Siegen Universitet klinikalarından dəvət olunmuş mütəxəssislərin iştirakı ilə I Azərbaycan-Alman Tibbi təlim kurslarının açılış mərasimi keçirilib.
İctimai Birlikdən AZXEBER.COM-a verilən məlumata görə, mərasimdə Azərbaycan Tibb Universitetinin prorektoru, Milli Məclisin deputatı, professor Rafiq Məmmədhəsənov, Azərbaycan-Almaniya Tibbi Əməkdaşlıq Cəmiyyətinin sədri, professor Qurban Müslümov, millət vəkilləri Ceyhun Osmanlı, Jalə Əliyeva, Məlahət İbrahimqızı, Azərbaycan Respublikasının Gənclər və İdman Nazirliyi yanında Gənclər Fondunun Layihələr və regionlarla iş sektorunun müdiri Vaqif Seyidbəyov, Azərbaycan Tibb Universitetinin Tədris-Terapevtik klinikasının direktoru, professor Surxay Musayev, elmi xadimlər, akademiklər, professorlar, “İRƏLİ” İctimai Birliyinin baş katibi Nərmin Məmmədova, ASAİF-in baş katibi Vüsal Qurbanov iştirak ediblər.
İlk olaraq çıxış edən Rafiq Məmmədhəsənov Azərbaycan Tibb Universitetində mütəmadi olaraq beynəlxalq səviyyəli tədbirlərin keçirilməsinin artıq ənənəyə çevrildiyini bildirib. Qeyd edib ki, təşkil edilən Azərbaycan-alman tibbi təlim kurslarının gənc təbiblərin inkişafında və onların müasir tibbin yenilikləri ilə bağlı məlumatlar əldə etmələrində böyük əhəmiyyəti var.
Azərbaycan-Almaniya Tibbi Əməkdaşlıq Cəmiyyətinin sədri, professor Qurban Müslümov layihə haqqında geniş məlumat verib. Müslüm Qurbanov qeyd edib ki, təlim kursları təbabətin ən aktual sahələrini: ümumi və laparoskopik cərrahiyyə, ginekologiya, anesteziologiya- reanimatologiya, radiologiya endoskopiya və s əhatə etməklə ən müasir təlim modelləri üzərində xüsusi proqram əsasında həyata keçiriləcək. Kurslardan əksəriyyəti rezidentlər və tələbələr olmaqla 500 nəfərə yaxın mütəxəssis yararlanacaq.
Daha sonra ATU-nun Tədris-Terapevtik klinikasının direktoru, professor Surxay Musayev son illər səhiyyənin inkişafında əldə edilmiş dinamik inkişafı qeyd edib, təhsilin keyfiyyətinin yüksəldilməsi istiqamətində atılan hər addımın xüsusi önəm daşıdığını vurğulayıb.Milli Məclisin deputatları Ceyhun Osmanlı, Məlahət İbrahimqızı, Jalə Əliyeva çıxış edərək qeyd ediblər ki, Azərbaycan səhiyyəsinin bugünkü inkişafı təkcə ölkə daxilində deyil, beynəlxalq aləmdə də müsbət qarşılanır. Bu səpkili tədbirlərin keçirilməsi buna bariz nümunədir. Gənclər öz üzərində işləməklə, bu kimi tədbirlərə qatılaraq bilik və təcrübələrini artıra bilərlər.
Azərbaycan Respublikasının Gənclər və İdman Nazirliyi yanında Gənclər Fondunun Layihələr və regionlarla iş sektorunun müdiri Vaqif Seyidbəyov öz çıxışında bu kimi tədbirlərin əhəmiyyətini qeyd edərək, gənclərin inkişafına, gələcək karyeralarına töhfə verəcəyini bildirib və daim Azərbaycan Gənclər Fondunun bu kimi tədbirlərin həyata keçirilməsinə dəstək olacağını vurğulayıb.
Tədbir zamanı Azərbaycan-Almaniya Tibbi Əməkdaşlıq Cəmiyyətinin Almaniyanın bir neçə universitetləri ilə birgə planlaşdırdığı “Elmi-kliniki tədqiqatların müasir əsasları və istiqamətləri“ adlı layihəsinin təqdimatı keçirilib.
Qeyd edək ki, təlimlər 2 oktyabr tarixinə qədər davam edəcək
