"Azərbaycan idmanının ümumi inkişafına gəldikdə hər şey göz qabağındadır"

Prezident İlham Əliyev Avropa çempionatında komanda hesabında çempion olan güləşçilərlə görüş keçirib.

Dövlət başçısı çıxışında Azərbaycan idmançılarının həm Olimpiya Oyunlarında, həm də dünya və Avropa çempionatlarında ölkəni daim ləyaqətlə təmsil etdiklərini vurğulayıb. O qeyd edib ki, idmançıların qələbə əzmi çox güclüdür və bu, ölkənin ümumi inkişafının göstəricisidir.

Prezident bildirib ki, Azərbaycan bu gün qalib dövlət və qalib xalq kimi yaşayır və əldə olunan idman nailiyyətləri ilə fəxr edir. O, idmançılarla görüşlərin müntəzəm xarakter daşıdığını da diqqətə çatdırıb.

İlham Əliyev əlavə edib ki, uzun illər ərzində ölkədə idmanın dayanıqlı inkişafı təmin olunub, uğurlar ardıcıl davam edir və yeni nəsil idmançılar yetişir. Dövlət başçısı əmin olduğunu bildirib ki, həm Güləş Federasiyası, həm də digər idman qurumları gələcəkdə fəaliyyətlərini elə quracaqlar ki, Azərbaycan xalqı idman yarışlarını izləyərkən daim sevinc hissi keçirəcək.

Sonda Prezident idmançıları əldə etdikləri uğurlar münasibətilə təbrik edib.