Ötən gün BAXCP sədri, millət vəkili Qüdrət Həsənqluliyev mətbuata açıqlamasında Azərbaycan Respublikasının adının dəyişdirilməsi üçün təklif irəli sürüb.
AZXEBER.COM-un məlumatına görə, partiya sədri təklif edib ki, Azərbaycan dövlətinin adı dəyişdirilərək Şimali Azərbaycan Respublikası olmalıdır. «Türkmənçay və Gülüstan müqavilələri parlamentin iclasına çıxarılaraq müzakirə edilməlidir. Azərbaycan parlamenti hər iki müqaviləyə hüquqi siyasi qiymət verilməlidir. Və parlamentdə rəsmən elan eləməliyik ki, Azərbaycan bölünmüş xalqdır. Mən hesab eliyirəm ki, biz adımızıda dəyişməliyik. Siz görürsünüz ki, indi iki Koreya dövlətinin birləşməsi məsələsi gündəmə gəlib. Vaxtı ilə almanlar birləşdilər indidə növbə Azərbaycana gəlib çatmaldır. Ona görə də Azərbayjan Respublikasının adı dəyişdirlərək Şimali Azərbaycan Respublikası olmalı».
AZXEBER.COM portalı məsələnin ictimaiyyət üçün maraq kəsb etdiyini düşünərək, bir neçə ziyalının fikrini öyrənib. İlk olaraq Azərbaycan Demokratik İslahatlar Partiyasının sədri, Milli Məclisin deputatı Asim Mollazadə məsələ ilə bağlı münasibətini bildirib. Millət vəkili bu cür təklifə ehtiyac olmadığını söyləyib: “Mən Qüdrət Həsənquliyevin təklifini şərh etmək istəmirəm. Çünki bu təklifə ciddi yanaşmıram. Onu deyim ki, bu təklif parlamentdə müzakirə mövzusu belə ola bilməz”.
AZXEBER.COM portalı məsələ ilə bağlı keçmiş millət vəkili, tarixçi Cəmil Həsənlinin də münasibətini öyrənmək istəyib. Ancaq Cəmil Həsənli məsələ ilə bağlı informasiyasının az olmasını əsas gətirərək, münasibət bildirməyib.
Təklifə dəstək verənlər arasında jurnalist, “Yedi devlet bir millet” konseyinin başqanı Azər Həsrət olub. O, bu cür təklifin reallaşmasını arzuladığını və bunun ictimaiyyət üçün çox önəmli olduğunu qeyd edib: “Bu fikri çox müsbət qarşılayıram. Çünki dünya bu problemi görməlidir. Bunun üçün də Azərbaycanın adının Şimali Azərbaycan olması lazımdır. Tarixə nəzər salsaq görərik ki, 90-cı illərin əvvəllərində iki hissəyə bölünmüş Almaniya birləşdi. Hazırda Şimali Koreya və Cənubi Koreyanın birləşdirilməsi məsələsi gündəmdədir. Ancaq biz hələ də Cənubi Azərbaycanın taleyi ilə bağlı heç nə düşünmürük. Mən Qüdrət müəllimin bu təklifi ilə tamamilə razıyam”.
