"Yığmanın heyətində 50 oyun keçirmək möhtəşəm hissdi. Ötən illər ərzində həm komandam gündən-günə gücləndi, həm də özüm şəxsi göstəricilərimi yaxşılaşdırdım. 50-ci matça kapitan sarğısı ilə çıxmaq unudulmaz an kimi yaddaşımda qalacaq”.
Apasport.az saytının məlumatına görə, bunu Şimali İrlandiya yığmasının yarımmüdafiəçisi Nayall MakQinn deyib.
DÇ-2018-in seçmə mərhələsi çərçivəsində Azərbaycan millisi üzərində böyükhesablı (4:0) qələbə qazanan Şimali İrlandiya dünən yoldaşlıq görüşündə Xorvatiyaya 0:3 hesabı ilə məğlub olub. Bu, 29 yaşlı futbolçunun milli komandasında 50-ci matçı olub.
Xorvatiya ilə görüşə kapitan qismində çıxan MakQinn yerli mətbuata açıqlamasında onun üçün Azərbaycanla görüşün nəticəsinin daha vacib olduğunu bildirib: "2016-cı ili major notda bitirdiyimi deməliyəm. Bu il Avropa çempionatının final mərhələsində iştirak etdim, hətta qol da vurdum. Amma bizim üçün hər oyunun ayrı önəmi oldu. Seçmə mərhələnin Azərbaycanla son matçı da belə oldu. Azərbaycan üzərində qələbə də mənim üçün digər görüşlər kimi xüsusidi”.
"Aberdin” klubunun hücumameyilli oyunçusu gələnilki hədəflərindən də söz açıb. O, həmçinin gələn il Azərbaycana qələbə dalınca gələcəklərini vurğulayıb: "Gələn ilin mart ayından etibarən daha gərgin oyunlar keçirəcəyik. Çünki turdan-tura həyəcan artır. Seçmə mərhələnin qarşıdakı 3 matçında maksimum nəticə göstərməliyik. İlk olaraq Norveçi qəbul edəcək, ardından isə Azərbaycan və San-Marino ilə qarşılaşacağıq. Çətin olacağını bilirik, amma yeganə məqsədimiz bu 3 görüşdə 9 xal toplamaqdı. Norveçi evdə məğlub edib, Azərbaycan və San-Marinoya da 3 xal dalınca gedəcəyik. İnanıram ki, son illər qazandığımız özünəinam bu görüşlərdə də köməyimizə çatacaq. Baş məşqçimiz komandada böyük ruh yüksəkliyi yaradıb. Bu, məni gələcəyə nikbin baxmağa vadar edir”.
Qeyd edək ki, Azərbaycan – Şimali İrlandiya oyunu iyun ayının 10-da keçiriləcək.
