Azərbaycanda hazırda eyni dərmanlar müxtəlif apteklərdə fərqli qiymətlərə satılır.
Dərman vasitələri üçün vahid qiymətin tətbiqi məqsədilə bağlı artıq Səhiyyə Nazirliyi İqtisadi İnkişaf Nazirliyi ilə birgə müzakirələr aparmağa başlayıb. Vahid qiymət siyasəti tətbiq edildikdə Azərbaycanda dövlət qeydiyyatına alınmış və dövlət reyestrinə daxil edilmiş bütün dərman preparatlarının qiymətləri həm özəl, həm də dövlət apteklərində eyni, təsdiq olunmuş qiymət əsasında olacaq.
Ancaq son dövrlər Azərbaycanda dərmanların qiymətləri süni şəkildə qaldırılır. Dəyəri 50 qəpik, 1 manat olan antibiotiklər 5-10 manata satılır ki, bu da istehlakçıların haqlı narazılığına səbəb olur.
Bununla yanaşı ölkəyə gətirilən dərman vasitələrinin içlik vərəqələri ilə bağlıda müəyyən problemlər mövcuddur. Qanunvericiliyə görə, həmin vərəqələr Azərbaycan dilində olmalı olsa da, praktikada bunun əksini müşahidə edirik. Belə ki, özəl apteklərdə satılan dərman preparatlarının əksəriyyətində içlik vərəqəsi ya Rus, ya dakı İngilis dilində alıcılara təqdim edilir.
Azad İstehlakçılar Birliyinin sədri Eyyub Hüseynov AZXEBER.COM-a verdiyi açıqlamada daha çox satışda olan dərmanların Hindistan istehsalı olmasına diqqət çəkib. O, Azərbaycanda dərman alıcılarının sayının Fransadan və Hindistandan az olmasına baxmayaq, qiymətlərin sözügedən ölkələrə nisbətdə daha baha olduğunu söyləyib:
“Azərbaycanda dərman preparatlarının qiymətlərində artım müşahidə olunur. Fransa, Hindistanla müqayisədə Azərbaycan əhalisinin dərmanlara olan marağı 20 dəfəyə qədər azdır”.
E. Hüseynov Azərbaycanda səhiyyə sektorunda olan problemlərin də qiymət artımına öz təsirini göstərdiyini bildirib. Onun fikrincə, hazırda Azərbaycan səhiyyəsində diaqnoz problemi müşahidə olunur və xəstələr buna görə xarici ölkələrə üz tutur:
“Azərbaycanda dərman yox, diaqnoz problemi var. Buda ölkə əhalisinin xaricə üz tutması ilə nəticələnir. Çox təssüf ki, ölkədə posientlərin müdafiəsi komitəsi hələ də yaradılmayıb”.
Fatimə İbrahimova
