2008-ci ilin fevralından Azərbaycanda dövlət xəstəxanaları pulsuz tibbi müalicə və müayinəyə keçib. Amma faktdır ki, dövlət xəstəxanalarında tibbi müalicə və müayinənin, o cümlədən cərrahiyyə əməliyyatların havayı olması yalnız sözdədir. Son günlər Dövlət xəstəxanalarında həyata keçirilən doğum əməliyyatlarıyla bağlı şikayətlər çoxalıb. Səhiyyə Nazirliyi bu kimi neqativ halların qarşısını almaq üçün ötən ilin fevral ayında Qaynar Xətt yaradıb.
AZXEBER.COM portalı Səhiyyə Nazirliyinin “Qaynar xətt” şöbəsiylə əlaqə saxlayıb və şöbəyə gələn şikayətlərlə maraqlanıb. Qaynar Xətdən bildirilib ki, nazirliyə daxil olan bütün şikayətlər araşdırılır: “Bu ilin əvvəllərindən etibarən dövlət doğum evlərindəki xəstələr bizə şikayətlə müraciət ediblər. 2 yanvar 2012-ci il tarixində 5 saylı doğum evinin xəstəsi öz şikayətində “tibb bacıları məndən pul istəyir” deyə bizə şikayət ünvanlayıb. Bundan başqa 4 saylı doğum evi ilə bağlı daxil olan şikayətdə isə “həkim məndən 50 manat şirinlik istəyib” deyilib. Bizə daxil olan bütün şikayətlər operativ şəkildə araşdırılır və günahkarlar cəzalandırılır”
Qaynar Xətdən bildirilib ki, ən böyük şikayət onlara bu gün daxil olub: “Bu gün- 6 fevral tarixində Qaynar xəttə şikayət daxil olub. Şikayətdə deyilib : “Məndən 2 nömrəli doğum evinin baş həkimi Mehriban xanım 350 AZN pul istədi. Verməyəcəyim təqdirdə uşağımın tələf olacığını bildirdi.”
AZXEBER.COM olaraq 2 saylı doğum evinin baş həkimi ilə əlaqə saxlamağa çalışdıq.Lakin baş həkimin köməkçisi baş həkim Mehriban Abbasquliyevanın yerində olmadığını bildirdi. Məsələyə yenidən qayıdacayıq.
Gülnarə Bayramova
