Yay insanlar üçün həm də məzuniyyət fəsli kimi xarakterizə olunur. Azərbaycan Əmək Məcəlləsinə görə, hər bir işçinin iş yerinin və vəzifəsinin saxlanılması şərtilə məzuniyyət hüququ var. Yay fəslinin ən axırıncı ayı avqustu geridə qoyduq. 3 aylıq yay fəslində hər kəs imkanı daxilində çalışdı ki, məzuniyyətə çıxıb işlədiyi bir ilin yorğunluğunu çıxarsın. Heç şübhəsiz hamı kimi nazirlərdən də məzuniyyətə çıxanlar oldu. Amma deyəsən mərkəzi icra hakimiyyəti orqanlarına rəhbərlik edən yüksək çinli məmurlardan bəziləri bu il məzuniyyətə çıxmağa hələ macal tapmayıb.
AZXEBER.COM-un məlumatına görə, modern.az-ın əməkdaşı nazirlərin məzuniyyətə çıxıb-çıxmadıqlarını dəqiqləşdirmək üçün mətbuat xidmətlərindən cavab öyrənməyə çalışıb.
Sənaye və Energetika Nazirliyininmətbuat xidmətinin rəhbəri Azər Mənsimli bildirib ki, nazir Natiq Əliyev hal-hazırda məzuniyyətdədir. “Cənab nazirin harda dincəlməsi barədə məlumatım yoxdur. Qanunun tələblərinə uyğun olaraq o da məzuniyyətə çıxıb və yaxın vaxtlarda işə qayıdacaq”.
Vergilər NazirliyininAnalitik informasiya mərkəzinin rəhbəri Mehdi Mirsəlimov bildirib ki, nazir Fazil Məmmədov bu il məzuniyyətdə olub. Nazirin artıq istirahətdən qayıtdığını deyən müsahibimiz onun necə gün məzuniyyətdə olduğunu və məzuniyyətini harda keçirdiyini şəxsi məlumat olduğuna görə açıqlamaq istəməyib.
Rabitə və İnformasiya Texnologiyaları Nazirliyininmətbuat xidmətinin rəhbəri Müşfiq Əmirov isə qeyd edib ki, nazir Əli Abbasov bu il hələ məzuniyyətə çıxa bilməyib. Bu da Əli müəllimin gərgin iş qrafiki ilə bağlıdır. “Cənab nazir hələ məzuniyyətə getməyib və iş başındadır. Bundan sonra məzuniyyətə gedib-getməyəcəyi isə bəlli deyil”.
Daxili İşlər Nazirliyininmətbuat xidmətinin rəis müaviniEhsan Zahidovun sözlərinə görə, nazir Ramil Usubov bu il məzuniyyətdə olub və hazırda vəzifəsinin icrasını davam etdirir.
Mədəniyyət və Turizm Nazirliyininmətbuat katibi İntiqam Hümbətov da nazir Əbülfəs Qarayevin qısa müddətlik də olsa, məzuniyyətə çıxdığını qeyd edib. “Bildiyim qədər cənab Əbülfəz Qarayev 10 günlük məzuniyyətdə olub. Amma artıq işə qayıdıb və vəzifəsinin icrasını davam etdirir”.
Sorğumuzla bağlı sırada digər nazirlər olacaq...
