Ötən ildən başlayaraq “Azərbaycan gəncliyi: 2011-2015-ci illərdə” Dövlət Proqramın icra müddəti ərzində hər il Bakı şəhəri istisna olmaqla, ölkənin şəhər və rayonlarından biri “Gənclər Paytaxtı” elan olunur.
Gənclər və İdman Nazirliyinin mətbuat xidmətindən AZXEBER.COM-a verilən xəbərə görə, “Gənclər Paytaxtı”nın elan olunmasının əsas məqsədi regionlarda gənclərlə işin daha da canlandırılmasıdır.Bu ilin 1 yanvar tarixindən etibarən gənclər www.genclerpaytaxti.az saytına daxil olaraq səsvermə yolu ilə “Gənclər Paytaxtı 2013”-ü seçə biləcəklər. Səsvermə 31 yanvar tarixinə kimi davam edəcək.Gənclər paytaxtının adı rəsmi olaraq Gənclər və İdman Nazirliyi tərəfindən 2 fevral - Azərbaycan Gənclər Günü elan ediləcək.Xatırladaq ki, 2012-ci ildə 1 mln. 700 mindən artıq istifadəçinin iştirakı ilə Gəncə şəhəri səsvermə nəticəsində “Gənclər Paytaxtı” elan olub. 1 il müddətinə seçilən “Gənclər Paytaxtı”nda gənclərin ictimai, siyasi, sosial, iqtisadi və mədəni həyatda fəal iştirakını təmin etmək, onların intellektual və yaradıcılıq potensialını artırmaq əsas şərtlərdən biridir.Azərbaycanın “Gənclər Paytaxtı”nın seçimində yaşadığı yerindən, vətəndaşlığından, yaşından, milliyyətindən asılı olmayaraq hər kəs bərabər hüquqla iştirak edə bilər.Qeyd edək ki, bir kompüterdən yalnız bir nəfər (bir şəhər və ya rayona) səs verə bilər. Hər verilən səs dərhal nəzərə alınır və şəhərin reytinqini bir xal artırır.2013-cü ilin Azərbaycanın Gənclər Paytaxtının səsvermə siyahısına əhalisi 50.000 və ondan yuxarı olan şəhər və rayonlar daxil edilib. Səsvermə siyahısında onlar əlifba sırasına görə ardıcıllıqla düzlənib.
