Ona qarşı cinayət işi açılıb.
Dərbəndin azərbaycanlı icra hakimi Qurban Qurbanov həbs olunub.
AZXEBER.COM xəbər verir ki, APA-nın Rusiya bürosunun məlumatına görə, bu barədə Rusiya Federasiyası İstintaq Komitəsinin Dağıstan Respublikası üzrə bölməsi məlumat yayıb.
Məlumatda bildirilib ki, bu ilin sentyabrın 16-da Qurban Qurbanova qarşı İstintaq Komitəsinin İstintaq İdarəsində Rusiya Federasiyası Cinayət Məcəlləsinin 286.2-ci maddəsi (vəzifə səlahiyyətlərini aşma) maddəsi ilə cinayət işi açılıb.
İstintaqın versiyasına görə, 2009-cu ildən 2013-cü ilə qədərki dövrdə Q.Qurbanov Rusiya Federasiyası və Dağıstan Respublikasının torpaq qanunvericiliyini pozaraq, vəzifə səlahiyyətlərini aşmaqla Dərbənd rayonunda yerləşən dövlətin mülkiyyətində olan 56 hektardan çox ərazini müxtəlif şəxslərə verib.
Hazırda cinayət işi ilə bağlı kompleks istintaq tədbirləri görülür və Qurban Qurbanovun barəsində həbs-qətimkan tədbirinin seçilib-seçilməməsi məsələsi müzakirə olunur.
