Mən özüm Azercell işlədirəm. Elə gözümü açandan. Ona görə də yuxarıda dediyim xəbərə elə birinci özüm sevinmişdim. Dəqiq desəm, Azercellin bir reklamı var idi (Elə indi də var). “Hər yerə” 1 dəqiqə-10 qəpik. Yəni digər mobil operatorlara, hətta evə də zəng vursam 1 dəqiqə üçün 10 qəpik gedəcək. Sonra Azercell yenidən sevindirdi məni. Yeni reklam çıxdı ki, “Şəbəkəxarici zənglərə 60% endirim”. Belə çıxdı ki, indi “hər yerə” 1 dəqiqə üçün 10 yox, 4 qəpik gedəcək! :) Yesss!!!
Amma... sevinməyim elə gözümdə qaldı. Tam əmin olmaq üçün durdum zəng vurdum Azercell-ə. Deyirəm ki, qıza (call centerdəki) “İndi mən 60% endirimlə 4 qəpiyə danışacağam?” Qız: “Yox, elə endirimdən sonra siz 10 qəpiyə danışırsınız.” Mən: “Onsuz da 10 qəpiyə idi də, day 60% endirimin nə rolu oldu?” Cavab yoxdu. Qız bayaq dediyini dedi.
Day sözüm yoxdu! Belə çıxdı ki, 60% endirimdən sonra 10 qəpiyə danışırıqsa, endirimdən qabaq biz 1 dəqiqə üçün 25 qəpik (!) ödəyirdik? 25 qəpik??? Bunlar bizi aldadırlar??? Niyə bütün ölkələrdə mobil qiymətlər ucuzdu, bizdə isə yox? Axı ucuz və əlçatan mobil rabitə bizim haqqımızdır.
Həmişə düşünürdüm ki, ölkədə bircə bu sahə qalıb ki, bizə seçim imkanı verirlər. Amma bunu biləndə bilmirəm nəyə inanım? Bütün günü reklam edirlər, deyirlər, rəngli-rəngli divanlar qoyublar şəhərə. Yəni bütün bunlar “yolaverdi”di? Nə sayırlar bu camaatı? Saytlarına baxın. Yazıblar ki, “Əhatə dairəsi-Azercell ölkə əhalisinin 99,8 %, ölkə ərazisinin isə 80%-nı (20% işğal olunmuş əraziləri çıxmaq şərti ilə).”
Azercell saytlarında yazıb ki, missiyaları “Var olan dəyərləri qorumaq, Yeni dəyərlər yaratmaq və Dəyərləri paylaşmaq”.
Mən biləni bizim dəyərlərimizdə yalan məlumat vermək və qarşındakını aldatmaq, sual verdikdə isə yalandan “lapşalamaq” və s. yoxdur.
Fidan HƏSƏNOVA
