“Bütün dünyada daha çox insan dərk etməyə başlayır ki, bu gün Ermənistan düzgün idarə olunmur”. Bunu jurnalistlərə Milli Məclisin vitse-spikeri Bahar Muradova bildirib.
Muradova deyib ki, Ermənistanda yürüdülən siyasət erməni xalqını uçuruma aparır. “Hər kəs öz ifadələrində nəyə qadir olduğunu göstərir. Bu gün Ermənistanda Serj Sarkisyanın timsalında həyata keçirilən rəsmi siyasət ölkəni bölgədə və dünyada izolyasiyaya doğru aparır, geriyə sürükləyir”, - vitse-spiker qeyd edib. B.Muradova bildirib ki, Sarkisyanın istər Dağlıq Qarabağ münaqişəsi ilə bağlı, istərsə də Ermənistanın tarixi, bu günü ilə bağlı söylədiyi fikirlərin əksəriyyəti siyasətçilər tərəfindən ciddi qəbul olunmur. Milli Məclisin sədr müavini hesab edir ki, erməni xalqının içərisində olan məntiqli, dövlətini düşünən insanlar bir araya gələrək öz xalqını xilas etməlidirlər. “Hər bir xalq öz problemini həll etməlidir və ermənilər də ölkələrində yürüdülən siyasətə öz kəskin münasibətlərini bildirməlidirlər”, - Muradova deyib.
