Suraxanı rayon Prokurorluğundan verilən məlumata görə, Bülbülə qəsəbə sakini, 1980-ci il təvəllüdlü Quliyev Firuz Yusif oğlu özünü öldürüb.
30 yaşlı oğlan yaşadığı evin həyətindəki metal borudan özünü asaraq, intihar edib.
Hüquq-mühafizə orqanlarından verilən məlumata görə, bu hadisə Rəhimov Tofiq İsrafil oğlunun dekabrın 28-dən 29-na keçən gecə döyülərək öldürülməsi olayı ilə birbaşa əlaqəlidir.
Belə ki, polis işçiləri 30 yaşlı F.Quliyevi saxlamaq üçün onun yaşadığı ünvana gəlib. Vəziyyətin gərginləşdiyini görən şəxs isə çıxış yolunu intihar etməkdə görüb.
Qeyd edək ki, hadisə baş verən zaman evdə heç kim olmayıb.
Lent.az-a verilən digər məlumata görə, F.Quliyev keçən gecə döyə-döyə öldürdüyü 1945-ci il təvəllüdlü T.Rəhimovun oğlu ilə dost olub.
Atalarının öldürüldüyündən xəbər tutan 5 oğul səhər saatlarından özləri qatili axtarmağa başlayıbmış. Artıq həm polis, həm də öldürdüyü kişinin oğulları tərəfindən tapılacağını görən 30 yaşlı Bülbülə sakini isə özünü öldürməkdən başqa yol tapmayıb.
Bütün bu məlum hadisələrlə yanaşı isə yalnız bir şey müəmmalı qalır: 30 yaşlı gənclə 65 yaşlı kişinin arasında olan münaqişənin səbəbi nədir?
Faktla bağlı araşdırma aparılır. // Lent.az
