Ölkənin iki ən böyük mobil operatoru “Bakcell LTD” MMC ilə “Azərcell Telekom” MMC arasında şəbəkələrarası bağlanmış müqavilədən irəli gələn anlaşılmazlıqlar məhkəmə müstəvisinə çıxarılıb.Bu barədə Bakı Apellyasiya Məhkəməsindən məlumat daxil olub. Məlumatda bildirilir ki, “Bakcell LTD” MMC ilə “Azərcell Telekom” arasındakı mübahisəyə ilk olaraq 1 saylı Bakı İnzibati-iqtisadi məhkəmədə baxılıb: «Lakin həmin məhkəmənin çıxardığı qətnamə “Bakcell LTD”ni təmin etməyib. Ona görə də qətnamədən apellyasiya şikayəti verilib. Hazırda işə Bakı Apellyasiya Məhkəməsində hakim Valeh Ağayevin sədrliyi ilə baxılır».“Bakcell LTD”nin “Azərcell Telekom” MMC-yə qarşı “müqaviləyə əlavənin bağlanmış hesab olunması, qarşılıqlı hesablaşma aktlarının etibarsız sayılması və vurulmuş zərərin tələb edilməsi”ndən bəhs edən şikayəti üzrə iyulun 17-də nəzərdə tutulan proses təxirə salınıb: «Hakim Valeh Ağayevin sədrliyi ilə işə iyulun 27-də baxılacaq».Məsələyə “Bakcell LTD” və “Azərcell Telekom”dan münasibət öyrənmək mümkün olmayıb.
