Bakıda keçirilən “Qran Pri-2013”də həyəcanlı anlar yaşanıb.
Bahalı qayıqlar, sürət və emosiyalar. Bakı buxtası bu gün “Formula-2” motorlu qayıqların “Qran Pri-2013”ə sahiblik edib. Yarışın başlanması üçün öncə motorlu qayıqlar bulvarın ərazisinə kranlar vasitəsi ilə dənizə endirildi. Yarışa start verilməmişdən əvvəl qayıqlar hazırlıq üçün dənizdə bir dəfə dövrə vurdular. Daha sonra hamının səbirsizliklə gözlədiyi an yetişdi. “Qran Pri-2013” turnirinə start verildi.“Qran Pri-2013” mükafatı uğrunda 18 ölkənin motorlu qayığı yarışırdı. Birincilik qazanmaq üçün isə onların qarşısında müəyyən öhdəliklər qoyulmuşdu. Amma yarışın başladığı ilk anlarda Finlandiyanı təmsil edən motorlu qayıq suda tərsinə çevrildi. Dərhal Fövqəladə Hallar Nazirliyinin Dövlət Sularda Xilasetmə Xidmətinin xilasediciləri suda çevrilən qayığı sahilə çıxardı. Finlandiya təmsilçisi yarışı tərk etdikdən sonra daha bir motorlu qayıq suya çevrildi, digəri isə texniki səbəbdən yarışı yarımçıq qoydu. Yarışı izləməyə gələnlər də iştirakçılar qədər həyəcanlı anlar yaşayırdı.Yarışa 18 iştirakçı başlasa da, 15 iştirakçı təyin olunan dövrəni vurduqdan sonra turniri başa çatdırdı. Və 45 dəqiqə ərzində suda 45 dəfə dövrə vuran Azərbaycanın motorlu qayığı ikinci yerə çıxdı.
