Avqustun 30-da “Fairmont Baku” otelində Xaricdə Təhsil Alan və Məzun Olmuş Gənclərin Beynəlxalq Forumunun (ASAIF) “Bizim Forum, bizim seçim, bizim Azərbaycan” devizi altında XI Yay Forumu işə başlamışdır. AZXEBER.COM xəbər verir ki, tədbirdə dövlət və hökumət rəsmiləri, Milli Məclisin deputatları, qeyri-hökumət təşkilatlarının təmsilçiləri, KİV nümayəndələri iştirak edirlər. Tədbirdə ASAİF-in sədriRamin Həkimovbildirmişdir ki, üç günlük tədbirin məqsədi xarici ölkələrdə təhsil alan gənclərin şəbəkələşmə prosesini gücləndirmək, ortaq azərbaycançılıq dəyərləri ətrafında birləşərək respublikamızın xaricdə təbliğinin daha səmərəli təşkilində, informasiya mübadiləsində, təbliğat işinin interaktiv qurulmasında gənclərimizə kömək etməkdir. ASAİF-in sədri diqqətə çatdırmışdır ki, Prezidentİlham Əliyevin 2011-ci il 7 iyul tarixli Sərəncamı ilə təsdiq edilmiş “Azərbaycan gəncliyi 2011-2015-ci illərdə” Dövlət Proqramı çərçivəsində Azərbaycan hökuməti tərəfindən dəstəklənən və artıq ənənə halını almış forumda dünyanın 45 ölkəsində təhsil alan 600-ə yaxın azərbaycanlı gənc iştirak edir. Builki forumun əsas yeniliklərdən biri “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” əsasında xaricdə təhsil alan gənclərin seçim prosesindən keçmədən birbaşa tədbirə dəvət olunmasıdır. Forum iştirakçılarını salamlayan təhsil naziriMikayıl CabbarovAzərbaycanda təhsilə, gənclərə göstərilən qayğıdan və bu sahədə ASAİF-in gördüyü işlərdən danışmışdır. Nazir bildirmişdir ki, hazırda 10 minə yaxın azərbaycanlı gənc dünyanın müxtəlif ölkələrində təhsil alır və onların sayı ildən-ilə artır. M.Cabbarov vurğulamışdır ki, respublikamızdan ilk dəfə olaraq 1919-cu ildə Azərbaycan Xalq Cümhuriyyətinin təşkilatçılığı ilə 100 nəfər xaricə oxumağa göndərilmişdir. Lakin sonradan onların çoxunun taleyi bəlli olmamışdır. Xaricdə təhsillə bağlı ikinci dalğa isə ulu öndər Heydər Əliyevin təşəbbüsü ilə Ümummilli Liderimizin Azərbaycanda birinci dəfə hakimiyyətdə olduğu 1969-1982-ci illəri əhatə etmişdir. Digər çıxış edənlər də forumun keçirilməsini yüksək qiymətləndirmiş, ölkəmizdə gənclərə olan dövlət qayğısından danışmışlar. Qeyd olunmuşdur ki, azərbaycanlı gənclərin xaricdə təhsil alması Azərbaycan həqiqətlərinin dünyada təbliğində çox böyük rol oynayır. Forum öz işini panel iclasları ilə davam etdirir.