Bakının Nərimanov rayonu Mirzəbala Məmmədzadə küçəsi, ev 13a, mənzil 15-də yaşayan Oleq Zülfəliyev bıçaqlanıb. Nərimanov Rayon Polis İdarəsi və 18-ci Polis Bölməsinin əməkdaşlarının keçirdiyi əməliyyat-axtarış tədbirləri nəticəsində Zülfəliyevi bıçaqlamaqda şübhəli bilinən Nurəhmədov Bəhruz Əlibəy oğlu saxlanılaraq istintaqa təhvil verilib. İstintaq zamanı bir çox maraqlı məqamlara, həmçinin Bəhruz və Oleqin hansı şəraitdə tanış olmalarına da aydınlıq gətirilib. Sən demə, Bəhruz Oleqlə bir neçə ay əvvəl sosial şəbəkələrin birində tanış olub. Zülfəliyevin qız adı altında intim xidmətlər təklif etməsi Nurəhmədovun diqqətini cəlb edib və beləcə onlar tanış olub. “İnternetdə nömrəsi var idi. Zəng elədim, getdim evinə. Parikdə idi, dedi “mən qız deyiləm”. Səsi də qız səsi idi. Birinci dəfə hər şey normal oldu”, deyə saxlanılan Bəhruz Nurəhmədov bildirib. Bir neçə dəfə Oleqin xidmətlərindən istifadə edən Bəhruz Nurəhmədov hadisə günü, yəni 20 noyabr 2011-ci il tarixində yenidən onun yaşadığı mənzilə yollanıb. Bu dəfə isə tərəflər arasında pul üstündə yaranan mübahisə qanlı sonluqla yekunlaşıb. Nərimanov Rayon Polis İdarəsinin baş müstəntiqi Elmar Hacıyevin sözlərinə görə, onlar internetdə tanış olub: “Zərərçəkən şəxs intim xidmətlər təklif edib. Onlar bir neçə dəfə görüşüblər. Axırıncı görüşdə aralarında pul üstündə mübahisə baş verib”. Saxlanılan B.Nurməmmədov deyib ki, Oleq bıçaqla onun üstünə gəlib: “Əlimi kəsdim, sonra dalaşdıq. Dava zamanı bıçaq ona girdi, o da yaşadığı evin blokuna qaçdı. Onda gördüm ki, bıçaq boynundan girib”. Faktla bağlı Bəhruz Nurəhmədov barəsində Nərimanov Rayon Polis İdarəsində Cinayət Məcəlləsinin 126.1 (qəsdən sağlamlığa ağır zərər vurma) maddəsi ilə cinayət işi başlanılıb, istintaq araşdırmaları davam etdirilir.
//Ans Press
