Azərbaycanın ev sahibliyi edəcəyi “Eurovision-2012” mahnı müsabiqəsi ilə bağlı Bakı Biznes Mərkəzində “Eurovision” mərkəzi fəaliyyətə başlayıb. APA-nın əməkdaşı həmin mərkəzdə olub və hazırlıq prosesi ilə tanış olub. Bildirək ki, Bakı Biznes Mərkəzinin girişində “Eurovision Song Contest Baku-2012” yazısı qeyd olunan plakatlar yerləşdirilib. Mərkəzdə “Eurovision” muzeyi yaradılacaq. Muzeydə 57 illik tarixə malik “Eurovision” yarışması, eləcə də sırf Azərbaycanın bu müsabiqədə iştirak tarixi təqdim olunacaq. “Eurovision” mərkəzində eyni zamanda mətbuat mərkəzi də fəaliyyət göstərəcək. Bu mərkəz müsabiqə boyu jurnalistlər və nümayəndə heyətləri üçün açıq olacaq. Burada mətbuat konfranslarının keçirilməsi üçün xüsusi zallar fəaliyyət göstərəcək. Bildirilir ki, mərkəz jurnalistlər, eləcə də nümayəndə heyətləri arasında təmasları asanlaşdıracaq, eyni zamanda çox rahat şəkildə böyük təbliğatın aparılmasına yardım edəcək. O da məlum olub ki, “Eurovision-2012" layihəsi ilə bağlı bütün məlumatlar bu mərkəzdən ötürüləcək. Mərkəz interaktiv xarakter daşıyır. Qeyd edək ki, “Eurovision” mərkəzinin qısa zamanda açılışının keçirilməsi nəzərdə tutulur. Hazırda bununla bağlı hazırlıqlar gedir.
