İZAZDER Biznesin İnkişafı Komitəsi 24 iyun 2025-ci il tarixində Bakı şəhərində Azərbaycan İqtisadiyyat Nazirliyinin Türkiyə Nümayəndəliyinin dəyərli dəstəyi ilə mühüm bir iqtisadi əməkdaşlıq tədbirinə ev sahibliyi etdi.
AZXEBER.COM xəbər verir ki, "Bir Millət, İki İqtisadiyyat” şüarı ilə keçirilən bu görüş Azərbaycan və Türkiyə arasında iqtisadi münasibətlərin inkişaf etdirilməsinə, yeni əməkdaşlıqların qurulmasına və sahibkarlıq mühitinin genişlənməsinə xidmət etdi.
Tədbirdə Türkiyə və Azərbaycandan müxtəlif sahələrdə fəaliyyət göstərən iş adamları, sahibkarlar, startap qurucuları, sənaye nümayəndələri və sərmayəçilər iştirak etdilər.
Gün ərzində təşkil olunan panel müzakirələri, ikitərəfli görüşlər (B2B) və təqdimat sessiyaları sayəsində çoxsaylı yeni əməkdaşlıq imkanları müzakirə olundu. Tərəflər arasında qarşılıqlı maraq doğuran layihələr üzərində ilkin razılaşmalar əldə edildi, investisiya imkanları dəyərləndirildi və gələcək birgə təşəbbüslər üçün zəmin yaradıldı.
Qeyd edək ki, İZAZDER rəhbərliyi tədbirlə bağlı aşağıdakı açıqlama verib:
"Bakı şəhərində ilk dəfə təşkil etdiyimiz bu tədbir bizim üçün yalnız işgüzar bir toplantı deyil, eyni zamanda qardaşlığımızın iqtisadi sahəyə daşınmasının simvoludur. Dəvətimizi qəbul edən bütün iştirakçılara, Azərbaycan İqtisadiyyat Nazirliyinin Türkiyə Nümayəndəliyinə və əməyi keçən hər kəsə təşəkkür edirik. Birlikdə daha güclü olacağıq.”
Tədbir iştirakçıları və təşkilatçılar arasında aparılan müzakirələrdə bu cür işgüzar platformaların gələcəkdə də mütəmadi keçirilməsi ilə bağlı ortaq fikir formalaşdı. İZAZDER qarşıdakı dövrdə müxtəlif sahələr üzrə həm Türkiyədə, həm də Azərbaycanda yeni təşəbbüslərlə iş dünyasına dəstək verməyə davam edəcəyini bildirdi.
