Fələstin hökuməti baş nazir Salam Fəyyadın istefasını qəbul edib. Yerli medianın məlumatına görə, prezident Mahmud Abbas Fəyyadın yeni hökumət qurulana qədər vəzifədə qalmasını təklif etsə də, o buna razılıq verməyib.Qeyd edək ki, bir müddət əvvəl Mahmud Abbasla Salam Fəyyad arasında baş nazir səlahiyyətlərinin genişləndirilməsi ilə bağlı qızğın mübahisələr olmuşdu. Fəyyadın vəzifəsini tərk etməsi isə ölkədə birmənalı qarşılanmır. İqtisadiyyat sahəsində Qərb təhsili görmüş Fəyyadın beynəlxalq dairələrdə yüksək nüfuza sahib olduğu, həmçinin İsraillə sülh danışıqlarının bərqərar olmasında aparıcı rola malik olduğu bildirilir. Beynəlxalq Valyuta Fondunun sabiq rəsmisi olan Fəyyadın Qərb Sahili bölgənin iqtisadiyatına təkan verəcək yeni proqramlar təqdim edəcəyi gözlənilirdi.Fəyyadın istefası ilə bağlı açıqlama verən HƏMAS hərəkatının nümayəndəsi Səmi Əbu Zuhri isə Fəyyadın istefasını düzgün qərar hesab etməyib: “Salam Fəyyadın istefasının Fələstində barışıq razılaşmasına heç bir aidiyyəti yoxdur. Bu sadəcə Salam Fəyyadla “Fəth” hərəkatı arasındakı fikir ayrılığıdır. “Fəth” hərəkatı onun getməsini tələb edirdi. Top indi “Fəth” məhkəməsinin əlindədir. Onlar əgər barışıq razılaşmasının şərtlərinə əməl etmək istəyirlərsə, bunu tam etməlidirlər. Fəyyad hökuməti tərk edir, lakin arxasında külli miqdarda borcu olan Fələstin xalqı qalır. Buna görə “Fəth” hərəkatı məsuliyyət daşıyır”.Qeyd edək ki, Salam Fəyyad 2007-ci ildən Fələstinin baş naziri kimi fəaliyyət göstərib. Bir müddət əvvəl isə ərəb kütləvi informasiya vasitələrində Fəyyadla Mahmud Abbas arasında hokümət siyasəti ilə əlaqədar narazılıqlar olduğu və istefa qərarının da bu səbəbdən olması fikirləri yayılmışdı.
