BDU-da ümummilli lider Heydər Əliyevi anım mərasimi keçirildi
GƏNCLİK
18:41 09.12.2011
2589
Bu gün Bakı Dövlət Universitetinin «Heydər Əliyev məktəbi»ndə ümummilli lider Heydər Əliyevi vəfat etməsinin 8-ci ildönümünə həsr edilmiş anım mərasimi keçirilib. Tədbiri açan rektor, akademik Abel Məhərrəmov ulu öndər H.Əliyevin misilsiz tarixi xidmətlərindən və azərbaycançılıq ideyalarından bəhs edib. Akademik A.Məhərrəmov Heydər Əliyevin Bakı Dövlət Universitetinin dünya şöhrətli məzunu olmasından, universitetin yubileylərinin keçirilməsinə göstərdiyi diqqət və qayğıdan danışıb. Akademik A.Məhərrəmov söyləyib ki, Bakı Dövlət Universiteti bugünkü səviyyəsinə, beynəlxalq nüfuzuna, dünya şöhrətli məzunlarına və yüksək elmi potensialına görə Heydər Əliyevə borcludur. Rektor ümummilli lider H.Əliyevin siyasətinin prezident İlham Əliyev tərəfindən uğurla davam etdirildiyini və ölkəmizin hər bir sahədə inkişaf etdiyini də qeyd edib.Daha sonra BDU-nun qədim dünya və orta əsrlər tarixi kafedrasının müdiri, AMEA Tarix İnstitutunun direktoru, professor Yaqub Mahmudov çıxış edib. Y.Mahmudov Bakı Dövlət Universitetinin hər zaman ümummilli lider Heydər Əliyevi hörmət və ehtiramla anmasını yüksək dəyərləndirib və Heydər Əliyevin ümumdünya tarixinin azərbaycanlı dahisi olduğunu və dünyanın Atatürk, Vaşinqton, Nehru, Şarl de Qoll kimi nadir tarixi simaları arasında öz layiqli yerini tutduğunu söyləyib.Sonra BDU-nun sosiologiya kafedrasının müdiri, professor İzzət Rüstəmov çıxış edib. O, Heydər Əliyevin rəhbərliyi altında çalışdığını və ulu öndərlə dünyanın bir çox ölkələrində olduğunu vurğulayaraq, xatirələrini tədbir iştirakçıları ilə bölüşüb. Heydər Əliyevin dünyada böyük nüfuza və hörmətə malik olduğunu qeyd edən İ.Rüstəmov onunla hər bir azərbaycanlının fəxr etdiyini bildirib.
