‘Belə getsə, Azərbaycan hakimiyyəti öz iradəsini bütün vasitələrlə ortaya qoyacaq’

Ermənilər hələ də Cənubi Qafqazda sülhü və sabitliyi təhlükə altında saxlayır, Azərbaycan torpaqlarının işğalını davam etdirirlər. Belə getsə, Azərbaycan hakimiyyəti öz iradəsini bütün vasitələrlə ortaya qoyacaq. Trend-in məlumatına görə, bunu Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov çərşənbə axşamı jurnalistlərin Şuşanın işğalının 20-ci ildönümü ilə bağlı verdiyi sualı cavablandırarkən deyib. "Azərbaycan ermənilərin qeyri-insani fəaliyyətini, Cənubi Qafqazda sülhü və sabitliyi təhlükə altına almalarını dəfələrlə pisləyib, Dağlıq Qarabağ münaqişəsinin həllini daha da çətinləşdirən addımlarını ifşa edib və pisləyib", - Həsənov deyib. Onu sözlərinə görə, bununla bağlı Azərbaycan dünyanın müvafiq qurumları qarşısında məsələ qaldırıb. "Ermənilərlə aparılan danışıqlarda hələ ki, bir effekt yoxdur", - PA-nın şöbə müdiri vurğulayıb.