Milli komandamız AVRO-2012-nin seçmə qrup mərhələsində çıxışını başa vurdu. Tarixində ilk dəfə seçmə mərhələni rekord göstərici - 7 xalla başa vurmasına baxmayaraq, baş məşqçi Berti Foqtsun başının üstünü qara buludlar alıb.
Futbol ictimaiyyətinin əksər nümayəndələri almaniyalının postunda qalmasını istəsə də, qocaman çalışdırıcının əleyhinə çıxanlar az deyil. Bəziləri yığmamızın tsikli 7 xalla başa vurmasını böyük uğur, bəziləri isə bunu yaradılan yüksək şəraitin qarşılığında maddi nöqtə sayır.
Bəs Foqtsun yığmamızdakı taleyi necə olacaq? İndi onun qalmasını istəyənləri də, istəməyənləri də ən çox bu sual düşündürür. Hətta bu məsələdə tərəflər az qala üz-üzə gəlir: kimisi almaniyalıya qəhrəman, kimisi də düşmən gözü ilə baxır.
Əslində, bu məsələdə tərəfləri haqlı saymamaq da olmur. Hərənin öz fikri, öz tutarlı arqumenti var və təbii ki, hər kəs öz mövqeyini daha düzgün sayır.
Sözsüz ki, almaniyalının komandamızdakı taleyinə ilin sonunadək keçirilməsi planlaşdırılan AFFA-nın İcraiyyə Komitəsinin iclasında aydınlıq gələcək. Çox güman, həmin toplantı millimizin noyabrda Tirana şəhərində Albaniya ilə keçirəcəyi yoldaşlıq görüşündən sonra baş tutacaq.
Bununla belə, həmin qarşılaşma yığmamızın Foqtsun rəhbərliyi altında sonuncu oyunu ola bilər. Bildiyimiz qədəri ilə nəticəsindən asılı olmayaraq həmin görüşlə almaniyalı çalışdırıcının komandamızdakı fəaliyyətinə son qoyulacaq.
Hər halda, AFFA-da da Foqtsun işindən narazı qalan var. Belə olmasaydı, assosiasiyanın I vitse-prezidenti Rauf Əliyev “yığmada yerli məşqçinin çalışmasının vaxtı çatıb” deməzdi.
Diqqətli oxucunun yadında olar, bir ay öncə AFFA prezidenti Rövnəq Abdullayev mətbuata açıqlamasında bildirmişdi ki, Foqtsun millimizdəki taleyi Avstriya və Türkiyə ilə oyunlardan asılıdır. Həmin oyunların nəticəsini isə hamı bilir.
Foqtsun postundan getməsini sürətləndirən digər amillər də var. Onun əsasən də yerli mətbuata biganə münasibəti, Premyer Liqa oyunlarını nadir hallarda izləməsi bəzi İK üzvlərinin ürəyincə deyil.
