"Əvvəl hicab geyinirdi, indi isə hicabda deyil” – bu sözləri son vaxtlar çox eşidirik. Xanımlar müxtəlif niyyətlərlə başına hicab bağlayır, sonradan isə normal geyimlərinə qayıdırlar. Bu isə müzakirələrə və xoşagəlməz söz-söhbətlərin ortaya çıxmasına səbəb olur.
Mövzu ilə əlaqədar tanınmış ilahiyyatçı , "Məşədi Dadaş” məscidinin imam camaatı hacı Şahin Həsənli açıqlama verib. Onun fikrincə, dini hökmlərə əməl etməkdə başlıca məsələ niyyətdir:
"İnsan xeyirxah əməlini Allah rizası üçün yerinə yetirməlidir. İnsan istər hicab geyinmək, istərsə də digər dini vaciblərə əməl etmək istəyirsə, bunu Allahın rizası üçün etməlidir. Bəzən insanlar başqa niyyətlərlə hicaba keçirlər. Kimi axına düşür, kimi, dəb xatirinə, kimi də ailə qurmaq üçün hicab bağlayır. Təbii ki, belə niyyətlərlə hicabı vasitə kimi istifadə etmək yolverilməzdir və günahdır. Din səmimiyyəti sevir, hər bir əməli səmimi şəkildə yerinə yetirməlidir.
Xanımlar hicab geyinib-geyinməməkdə azaddır. Qurani-Kərimdə hicabın bağlanması barədə ayə var, amma bu, insanın öz ixtiyarında olan məsələdir. Yaxşı olar ki, belə məsələlərə qadınlar ciddi yanaşsınlar. Çünki din xatirinə deyil, hər hansı məqsəd üçün hicab bağlayan şəxslər dini dəyərlərin ucuzlaşmasına gətirib çıxarır, başqalarında dinə qarşı inamsızlıq yaradır. Dini cəhətdən vacib nüanslarla, o cümlədən hicabla zarafat etmək olmaz”.
modern.az
