" Biz bu gün bu diqqət və qayğını görməkdəyik"
Bunu Azxeber.com-a açıqlamasında Bibiheybetneft NQÇİ-nin Yeni Azərbaycan Partiyasının (YAP) Gənclər Birliyinin sədri Ruslan Abışov deyib.
Sədr qeyd edib ki, ilk dəfə Azərbaycanda Gənclər Günü təsis olunduqdan sonra BMT də belə bir addım atıb: "Gənclər Günü ondan xəbər verir ki, Azərbaycanda dövlət siyasətinin əsas istiqamətlərindən biri də gənclərə olan qayğıdır. Biz bu gün bu diqqət və qayğını görməkdəyik. Müstəqil Azərbaycanın inkişafı üçün gənclər dövlət, qanunverici, hüquq-mühafizə orqanlarına işə cəlb ediliblər. Yeni Azərbaycan Partiyası gənclərə seçməklə yanaşı, seçilmək hüququnu da bəxş edib. Bu gün yerli idarəetmə orqanlarında, parlamentdə, diplomatik korpuslarda təmsil olunuruq.
R.Abışovun sözlərinə görə, Azərbaycanda gənclər siyasəti elə bir səviyyəyə çatıb ki, dövlətimizdə könüllülük institutu formalaşmağa başlayıb: "Gənclərimiz dövlət başçısına o qədər bağlıdır ki, bizim tələbələrimiz, gənclərimiz Azərbaycandakı beynəlxalq tədbirlərdə könüllü fədakarlıqlarını göstərirlər. Bu da cənab Prezidentimizə, dövlətimizə olan sevgidən qaynaqlanır.
Ulu öndərimizin Azərbaycançılıq ideologiyasının tərkib hissəsi olan vətənpərvərlik bu gün dövlətimizdə öz məntiqli nəticəsini göstərməkdədir”.
Ruslan Abışov vurğulayıb ki, Sevindirici haldır ki, dövlətimiz gənclərimizi unutmur. Azərbaycan gəncliyi cənab Prezidentimizin ətrafında sıx birləşib. Mən bütün Azərbaycan gəncliyini təbrik edir, onlara uzun ömür, cansağlığı arzu edirəm”.
