Son günlər ölkə ərazisində yanğınların sayının artması diqqət çəkir. Lakin bu cür halların qarşısının alınması və təhlükəsizlik tədbirlərinin gücləndirilməsi istiqamətində koordinasiyalı fəaliyyət müşahidə olunmur. Əksinə, bir çox hallarda məsul qurumlar problemi həll etmək əvəzinə məsuliyyəti öz üzərlərindən ataraq digər qurumların üzərinə yönəltməyə çalışırlar. Bu isə həm ictimai narazılığın artmasına, həm də real vəziyyətlə bağlı yanlış təsəvvürlərin yaranmasına səbəb olur.
Belə hadisələr yalnız maddi ziyanla məhdudlaşmır, eyni zamanda insanların ölümünə və xəsarət almasına da səbəb olur. Qurumlararası ziddiyyət və şəffaf məlumat çatışmazlığı, xüsusilə də fövqəladə hallar zamanı fake xəbərlərin yayılmasını daha da sürətləndirir. İctimaiyyət dəqiq və operativ məlumat almadıqda, sosial şəbəkələrdə müxtəlif versiyalar tirajlanır və bu, əlavə çaşqınlıq yaradır.
Bu cür hadisələr son zamanlarla məhdudlaşmır. Ötən illərdə də oxşar yanaşmaların şahidi olmuşuq. Məsələn, vaxtilə "Azadlıq” metro stansiyası yaxınlığında 16 mərtəbəli yaşayış binasında baş verən yanğın zamanı ilkin məlumatlarda ziddiyyət müşahidə olunmuş, hadisənin səbəbi və məsuliyyət daşıyan tərəf barədə qurumlar arasında açıqlama uyğunsuzluqları ortaya çıxmışdı.
Milli Məclisin deputatı Fazil Mustafa AZXEBER.COM-a açıqlamasında bildirib ki, hər sahənin idarə olunmasında məsuliyyət hissi olmalıdır:
"Hər sahənin idarə olunmasında məsuliyyət motivasiyası olmalıdır. Hər kəs bilməlidir ki, gördüyü hər bir əmələ görə məsuliyyət daşıyır. Lakin bizdə məsuliyyət anlayışı bir qədər məhdud təsəvvür olunur. Fövqəladə Hallar Nazirliyinin Dövlət Yanğın Nəzarəti Xidmətinin əməkdaşları çox zaman böyük əziyyətlərlə üzləşirlər. Elə hallar olur ki, bina həyətlərinə belə daxil ola bilmirlər. Çünki biz heç bir işin sabahını düşünməmişik. Eyni zamanda hər hansı fəaliyyətin təhlükələrini əvvəlcədən planlaşdırmırıq. Nəticədə isə faciəvi hadisələr baş verir. Buna görə də müvafiq qurumlar nəzarəti gücləndirməlidir”.
Deputat deyib ki, cəmiyyətdə məsuliyyət duyğusunun aşağı olması bütün sahələrə təsir göstərir:
"Hər bir insan, hansı sahədə işləməsindən asılı olmayaraq, özündən sonra gələn üçün təhlükə yaratmamalıdır. Məsələn, binanı tikən şəxs sabah orada yarana biləcək riskləri və FHN əməkdaşlarının həmin yerə necə daxil olacağını düşünməlidir. Amma çox vaxt insanlar vəziyyətdən çıxmaq və məsuliyyəti gizlətmək üçün üzərlərinə düşəndən daha az öhdəlik götürürlər. Bu kimi məsələləri cəmiyyət olaraq bir-birimizə daim xatırlatmalı və məsuliyyət mədəniyyətini formalaşdırmalıyıq”.
Şahanə Ziyad
