Son illər smartfonlardan istifadənin genişlənməsi ilə mobil tətbiqlər insanların gündəlik həyatının ayrılmaz hissəsinə çevrilib.
AZXEBER.COM mobil tətbiqlərin reytinq göstəricilərinə istinadən xəbər verir ki, 2026-cı il üzrə Azərbaycanda Google Play platformasında ən populyar və ən çox gəlir gətirən tətbiqlərin siyahısı açıqlanıb.
"Ən yaxşı pulsuz tətbiqlər” kateqoriyasında ilk pillədə dövlət xidmətlərini rəqəmsal formada təqdim edən "mygov” qərarlaşıb. Siyahının ikinci sırasında dünyada geniş istifadə olunan "WhatsApp Messenger”, üçüncü pilləsində isə qısa videolar platforması "TikTok” yer alıb.
Reytinqdə daha sonra "SİMA” və "ChatGPT” tətbiqləri qərarlaşıb. Siyahı göstərir ki, Azərbaycanda istifadəçilərin maraqları yalnız sosial şəbəkələrlə
məhdudlaşmır. Dövlət xidmətlərinə çıxış, süni intellekt alətləri və gündəlik işləri asanlaşdıran rəqəmsal həllər də geniş istifadə olunur.
Bununla yanaşı, tətbiqlərin gəlir göstəriciləri də diqqət çəkir. 2026-cı ilin "Ən çox gəlir əldə edən tətbiqlər” siyahısında ilk sırada "TikTok” qərarlaşıb.
Gəlir reytinqində ikinci yeri "Google One”, üçüncü yeri isə "Azar” tutub. İlk beşliyə "TopTop” və "eFootball™” da daxil olub.
Siyahıda diqqət çəkən məqamlardan biri də son dövrlərdə Azərbaycanda populyarlığı ilə seçilən "SUGO” tətbiqinin yer almasıdır. Belə ki, tətbiq ən çox gəlir gətirən mobil tətbiqlər arasında 6-cı pillədə qərarlaşıb.
Fəridə Əsədzadə
