Bir insanın sizdən xoşlanıb-xoşlanmadığını yalnız sözlərindən və davranışlarından anlamaq həmişə asan olmur. Araşdırma göstərib ki, romantik marağın göstəricilərindən biri insanların fərqində olmadan bədən hərəkətlərini bir-birinə uyğunlaşdırması ola bilər.
McMaster Universitetinin LIVELab komandası insanlar arasındakı "şəxslərarası sinxronizasiya"nı araşdırıb. Tədqiqatçılar 2018-ci ildə hazırladıqları hərəkət ölçmə metodundan romantik münasibətləri öyrənmək üçün istifadə ediblər.
Araşdırmada iştirak edən şəxslər sürətli tanışlıq formatında dörd dəqiqəlik görüşlər keçiriblər. Onların bədən hərəkətləri xüsusi sensorlar və infraqırmızı kameralar vasitəsilə qeydə alınıb. Hər görüşdən sonra iştirakçılardan qarşı tərəflə yenidən görüşmək istəyib-istəmədikləri və uzunmüddətli münasibət axtarıb-axtarmadıqları soruşulub.
Alimlər xüsusilə bir insanın bədən hərəkətlərinin qarşısındakı şəxsin sonrakı hərəkətlərini nə dərəcədə "proqnozlaşdıra bildiyini" araşdırıblar. Nəticələr göstərib ki, tərəflərin hərəkətləri arasındakı uyğunluq qısamüddətli deyil, uzunmüddətli romantik maraqla daha çox əlaqəlidir.
Bu əlaqə iştirakçıların fiziki cəlbediciliyi nəzərə alındıqdan sonra da qorunub. Tədqiqatçılar hesab edirlər ki, bədən hərəkətlərinin belə uyğunlaşması iki insan arasındakı ünsiyyətin keyfiyyəti və müəyyən şəxsiyyət xüsusiyyətlərinin uyğunluğu barədə ipucu verə bilər.
Maraqlıdır ki, bədən hərəkətlərindəki sinxronluq qısamüddətli münasibət istəyini proqnozlaşdırmayıb. Əlaqə yalnız uzunmüddətli münasibət marağında daha aydın müşahidə olunub.
Araşdırmada musiqinin təsiri də yoxlanılıb. Daha sakit musiqilərin səsləndirildiyi görüşlərdə iştirakçıların 45 faizi qarşı tərəflə yenidən görüşmək istədiyini bildirib. Daha ritmik musiqilərin səsləndirildiyi görüşlərdə isə bu göstərici 50 faizə yüksəlib.
Alimlər qeyd edirlər ki, fərq böyük olmasa da, birlikdə hərəkət etməyə təşviq edən musiqi insanlar arasında əlaqə hissini və ikinci görüşə marağı müəyyən qədər artıra bilər.
Araşdırmanın nəticələri "Social Cognitive and Affective Neuroscience" jurnalında dərc olunub.
///demokrat.az///
