Oktyabrın 21-də YAP-ın 63 saylı Sabirabad birinci seçki dairəsindən deputatlığa namizədi Elçin Quliyevin rayonun Əsədli və Qaralar kəndlərində seçiciləri ilə görüşləri keçirildi
Deputatlığa namizəd Elçin Quliyev onunla görüşə gələn çoxsaylı seçicilərinə təşəkkür edərək namizədliyini Milli Məclisin deputatlığına irəli sürdüyünə, ona etimad göstərdiyinə görə partiyanın rəhbərliyinə minnətdarlığını bildirdi: « Seçicilərin mənə inam göstərəcəyi və parlamentin üzvlüyünə seçiləcəyim təqdirdə çalışacağam ki, qarşıdakı beş ildə də fəaliyyətimi seçicilərimin istəyinə uyğun qurum və dövlətimizin qarşıya qoyduğu vəzifələrin yerinə yetirilməsinə öz töhfəmi verim».
Deputatlığa namizəd vurğuladı ki, YAP yalnız Azərbaycanın deyil, bütün Cənubi Qafqazın ən monolit, ən qüdrətli bir siyasi qurumudur. Ulu öndər Heydər Əliyevin rəhbərliyi ilə yaranan bu siyasi təşkilat ölkəmizdə dövlət quruculuğuna, müstəqilliyin möhkəmlənməsinə, ölkənin inkişafına, respublikada vətəndaş cəmiyyətinin, milli birliyin formalaşmasına sanballı töhfələr verib.
Bu gün YAP cəmiyyət tərəfindən birmənalı olaraq quruculuq, sabitlik, inkişaf, rifah və xalqın partiyası kimi qəbul edilir. Hazırda YAP-ın üzvlərinin sayının 670 minə çatması və burada gənclərin, qadınların, ziyalıların sayının kifayət qədər çox olması göstərir ki, xalqımızın bütün fəal təbəqələri bu partiyada olmaq, özlərinin ictimai, siyasi, sosial arzularını bu qurum vasitəsilə reallaşdırmaq istəyirlər. YAP müxalifət partiyası kimi yaransa da, qısa müddət ərzində iqtidara gəlib və ölkəmizdə 1993-cü ildən etibarən keçirilən bütün seçkilərdə qələbələr qazanıb. Bu, o deməkdir ki, xalqın partiyamıza böyük etimadı var və onun irəli sürdüyü proqramları, siyasi, iqtisadi, sosial layihələri dəstəkləyir. YAP-ın Sədri cənab İlham Əliyev ölkəmizdə keçirilən son üç prezident seçkisində Azərbaycan xalqının mütləq əksəriyyətinin yüksək etimadını qazanan və dövlət başçısı kimi bu etimadı layiqincə doğruldan, xalqın lideri səviyyəsinə yüksələn böyük bir şəxsiyyətdir ki, bu da partiyamızın nüfuzunun artmasında, ictimai-siyasi mövqeyinin möhkəmlənməsində mühüm rol oynayır.
Görüşlərdə kənd sakinləri- ağsaqqallar, gənclər çıxış edərək deputatlığa namizəd Elçin Quliyevə səs verəcəklərini birmənalı şəkildə bildirdilər.
