Helsinki Vətəndaş Assambleyasının Azərbaycan Milli Komitəsinin rəhbəri Arzu Abdullayeva sensasion açıqlama verib.
Hüquq müdafiəçisi məhbusların problemlərinə dair tədbirdə çıxışında bildirib ki, bir neçə ay öncə əməkdaşı Bayram Sadıqovla birlikdə həbsdə olan keçmiş iqtisadi inkişaf naziri Fərhad Əliyevlə görüşüblər. Bu görüşdə onları zəhərləyiblər. Belə ki, həbsxanada onlara verilən çaya zəhərli maddə qatılıb: “Çayı bizə bir nəfər gətirdi. Biz də çaydan bir az içdik. Bir müddətdən sonra Bayram müəllimin də, mənim də halımız pisləşdi”. A.Abdullayeva qeyd edib ki, hazırda hakimiyyətdəki qruplaşmalar arasında gərgin mübarizə gedir və bəzi qüvvələr bu kimi mənfi hallar törədərək qarışıqlıq yaratmaqda maraqlıdır. Onun dediyinə görə, bəzi qüvvələr öz adamlarını həbsxanaya göndərərək istədikləri addımları atdıra bilirlər: “Həbsxanada bizə çayı gətirən həmin şəxs Pentensiar Xidmətin əməkdaşına bənzəmirdi. O məhkuma da oxşamırdı. O daha çox öyrədilib ora göndərilən adama bənzəyirdi”. Ədliyyə Nazirliyi Penitensiar Xidmətinin mətbuat xidmətinin rəhbəri Mehman Sadıqov hüquq müdafiəçisinin zəhərlənmə iddiasına aydınlıq gətirdi. Qurumun sözçüsü “Yeni Müsavat”a açıqlamasında A.Abdullayevanın bəyanatından təəssüfləndiyini vurğuladı: “Əvvəla, Arzu xanım ora gələndə artıq yolda özünü yaxşı hiss etməyib. İkincisi, həmin vaxt bizim əməkdaşlarımız da onlarla bir yerdə olub və həmin çaydan içiblər. Bu necə ola bilər? Çox gülməli iddiadır və təəssüf edirəm ki, belə bir açıqlama ilə Arzu xanım çıxış edib. Arzu xanım deyir ki, çayı gətirən şəxslər Penitensiar Xidmətin əməkdaşlarına oxşamırdı. Bu isə ümumiyyətlə absurd fikirdir. Bura cəzaçəkmə müəssisəsidir və kənar şəxs necə içəri daxil olub, üstəlik, çay gətirə bilər?”. M.Sadıqov məhbus ailələrinin səsləndirdiyi ittihamlara da cavab verdi. O, Nemət Pənahlının olduğu 17 saylı cəzaçəkmə müəssisəsində pul yığılması, məhkumlara işgəncə verilməsi iddialarını rədd etdi: “17 saylı cəza çəkmə müəssisəsi qarışıq bir yerdir və ciddi rejimdir. Kim qanuna zidd hərəkətə yol verirsə, digər məhkumun haqqını tapdalayırsa buna necə yol vermək olmaz. Biz kimisə alçaltmırıq, işgəncə vermirik. Bu Nemət Pənahlının uydurmalarıdır. Kimlərsə orada kriminal şərait yaratmaq istəyirdi bunun qarşısı alındı. Orada yüzlərlə dustaq saxlanır. Biz məhkumların şəraitinin yaxşılaşdırılması üçün əlimizdən gələni edirik. Bu günlərə məhkum televiziyası da yaradıldı. Səfirliklərlə əməkdaşlıq edirik. Polşa səfiri uşaq cəzaçəkmə müəssisələrinə kompüter dəstləri bağışladı. Biz özümüz də bu işləri görürük, eyni zamanda səfirliklər də dəstəyini əsirgəmir. Sonra 10 dəst tədris partaları verildi. Məhkum uşaqlara bilyard, kompüter bağışlandı”. Müsahibimiz məhkumların yaxınları ilə telefonla danışması üçün onlardan pul alınmadığını söylədi: “Biz qanunvericiliyə dəyişiklik etdik və məhbusların telefondan danışıq imkanlarını daha da artırdıq. Yeni telefon xətləri çəkilir, aparatlar alınır. Penitensiar Xidmət əməkdaşının onların 1-2 manatı nəyinə lazımdır? Pərviz Mikayılova gəlincə, o özünü qüllədən atmağa cəhd edib. Bu adamın psixoloji vəziyyəti yerində olmayıb, sonra intihar edib. Ona niyə işgəncə verilməlidir ki? Bu kimə lazımdır? Bunlar absurd fikirlərdir. Təbii ki, problemlər var və biz onu aradan qaldırmağa çalışırıq”.
