Ekspertlər qanunvericilik sahəsində müsbət addımları qeyd ediblər.
BMT-nin Qadınlara qarşı diskriminasiyanın aradan qaldırılması üzrə Komitəsinin üzvləri eyniadlı Konvensiyanın yerinə yetirilməsinə dair hesabatla çıxış etmiş ölkələrə yekun tövsiyələrini verib.
Oxu.Az xəbər verir ki, həmin ölkələr arasında Azərbaycan və Qırğızıstan da var.
Ekspertlər qanunvericilik sahəsində müsbət addımları qeyd edərək Azərbaycan hakimiyyətini gender bərabərliyi sahəsində Milli plan qəbul etməyə və qadınların siyasi və ictimai həyatda daha geniş təmsil olunmalarını təmin etməyə çağırıblar.
Komitə üzvləri məişət zorakılığı, qadın alveri və fahişəliklə mübarizə üzrə strategiyanın qəbul olunmasının zərurliyi barədə bəyan ediblər.
Komitənin fikrincə, qadınlara qarşı zorakılıq Qırğızıstanda da problemdir. Ekspertlər bu ölkədə məişət zorakılığına qarşı münasibətin dəyişdirilməsini tələb edirlər.
Ekspertlər Qırğızıstan hökumətindən patriarxal stereotiplər və gəlinin qaçırılması və erkən nikahlar kimi bəd adətlərə qarşı mübarizə üçün təcili olaraq addımlar atmağa çağırıb.
Qadınlara qarşı diskriminasiyanın aradan qaldırılması üzrə Konvensiyanın yerinə yetirilməsi ilə bağlı Komitə qarşısında Azərbaycan və Qırğızıstanla yanaşı, Qabon, Danimarka, Maldiv, Tuvalu, Ekvador və Eriteriya da hesabatla çıxış edib.
