Əməliyyat haqqında hələlik rəsmi məlumat olmasa da, Bakı Nəqliyyat Agentliyinin İdarə Heyətinin sədri Vüsal Kərimli əməliyyat keçirildiyini təsdiqləyib: "Mən hazırda məzuniyyətdəyəm. Bəli, BNA-da əməliyyat keçirilib, istintaq aparılır. Saxlanılanlarla və mənimlə bağlı aidiyyatı qurum məlumat verəcək.  Xeyr, mənimlə bağlı hələki problem yoxdur,  dəvət olunmamışam”.

2015-ci ildə yaradılan BNA-nın uğursuz fəaliyyəti zaman-zaman ictimaiyyət nümayəndələrinin, deputaların tənqid hədəfi olub. Məhz bu tənqidlərdən sonra BNA 2023-ci ilin 19 aprelindən Bakı Şəhər İcra Hakimiyyətinin tabeliyinə verildi. 

Bütün bunlara baxmayaraq, agentliklə bağlı nöqsanlar hələ də mətbuat səhifələrində dərc edilir, quruma qarşı ictimaiyyət tərəfindən tənqidlər səsləndirilir. 

Bəs, yarandığı gündən bu günə kimi Bakı Nəqliyyat Agentliyi niyə uğursuz bir quruma çevrildi? 

Mövzu ilə bağlı AZXEBER.COM-a danışan Milli Məclisin deputatı Rüfət Quliyev sözügedən agentliyin qarşısına qoyulan heç bir işi yerinə yetirə bilmədiyini bildirib:

 

"3 il öncə Milli Məclisdə jurnalistlərə açıqlamamda avtobuslarla, cərimələrlə , avtomobillərin dayanma-durması ilə əlaqədar böyük problemlərin olduğunu deyib, tənqid etmişəm. Bu qurumun yaradılmasında məqsəd ondan ibarət idi ki, Bakı şəhərində nəqliyyat problemləri  həll olunsun. Əfsuslar olsun ki, problemlər həll olunmadı. Parkomatlarla, ictimai nəqliyyatın normal işləməsi istiqamətində problemlərin heç biri həllini tapmadı. Cəhdlər göstərildi, ancaq düzgün formada iş qurulmadı. Bu məsələləri dəfələrlə  tənqid edirdim. Çalışırdım öz məsləhətimi verim. Ancaq nə məsləhəti, nə də tənqidi normal qəbul etmirdilər. Ataların sözü var ki, gedənin dalınca danışmaq düz deyil. Ancaq BNA-nın Bakı Şəhər İcra Hakimiyyətinin tabeliyinə verilməsini tam doğru addım hesab edirəm. Gözləntilər ondan ibarətdir ki, Bakı Şəhər İcra Hakimiyyəti məsələni köklü formada aparacaq. İctimai nəqliyyatın idarə edilməsi intellektual səviyyədə olmalıdır. Aldığım məlumata görə 100-ə yaxın avtobus ehtiyyat hissələrinin olmadığına görə maşruta çıxa bilmirdi. Bu da qeyd etdiyim kimi böyük narazılıqların yaranmasına gətirib çıxarırdı”.

Rüfət Quliyev qeyd edib ki, Bakı Nəqliyyat Agentliyindən fərqli olaraq Bakı Şəhər İcra Hakimiyyəti məsələlərə xüsusi önəm verir:

"Problemləri kökündən həll etmək lazımdır. Ancaq bir məqamı nəzərə almaq lazımdır ki, Azərbaycanda urbanizasiya problemi var. Şəhər mərkəzlərinə böyük insan axını var. Xaricdən gətirilən minik avtomobillərinin sayı artır. Hətta pandemiya zamanıda da 15 faizə qədər artım var idi. Bunların hamısını nəzərə alaraq düşünürəm ki, bu məsələlər kökündən həll olunacaq. Elə birinci yaxşı xəbər ondan ibarətdir ki, Nazirlər Kabinetinin qərarı ilə icazə olunan yerlərdə  nəqliyyat vasitələrinin parklanması üçün saat 22:00-dan 07:00-ə qədər, eləcə də həftənin bazar günləri ödəniş tələb olunmur. Belə bir proqnoz vermək istəyirəm ki, qalan problemləri Bakı Şəhər İcra Hakimiyyəti tamamilə həll edəcək. Müəyyən addımlar atılır, bu addımların sürətini artırmaq lazımdır”.