Bu gün Təbriz məhkəməsinin Azərbaycan vətəndaşları – Fərid Hüseyn və Şəhriyar Hacızadə ilə bağlı qərar verəcəyi gözlənilir.
AZXEBER.COM-un məlumatına görə, gənc şairlərin məhkəmə prosesi avqustun 7-də keçirilib. Azərbaycan XİN-in mətbuat xidmətinin məlumatına görə, məhkəmə zamanı soydaşlarımız verilən sualları cavablandırıb və günahkar olmadıqlarını deyiblər. Onlar bəyan ediblər ki, İrana səfər etməkdə hər hansı cinayət xarakterli niyyətləri olmayıb. Azərbaycan vətəndaşlarına verilən suallar İrana səfərlərinin məqsədi barədə olub. İranlı hakim Fərid Hüseyn və Şəhriyar Hacızadənin konkret hansı maddə ilə ittiham olunması ilə bağlı rəsmi olaraq məlumat bildirməyib və yaxın günlərdə məhkəmənin qərarının olacağını vurğulayıb. Azərbaycanlı şairlər İrana festivalında iştirak üçün gəldiklərini və heç bir cinayət törətmədiklərini deyiblər. Qeyd edək ki, Azərbaycanın Təbrizdəki konsulluğunun əməkdaşı və şairlərin yaxın ailə üzvləri məhkəmə prosesində iştirak ediblər. Azərbaycan vətəndaşları bu il mayın 2-də İranda həbs ediliblər.
Onlar İran ərazisinə icazəsiz daxil olmaqda ittiham edilirlər.
