Bu ölkədən maşın gətirənlərə pis xəbər

Bu ölkədən maşın gətirənlərə pis xəbər
SOSİAL
10:46 17.11.2026
70
Gürcüstanda avtomobillərin təkrar ixracı ilə bağlı yeni qaydalar qüvvəyə minib.

Noyabrın 16-dan etibarən ölkədən xaricə təkrar ixrac edilən hər minik avtomobilinin rəsmiləşdirilməsi üçün əlavə 450 lari (289 manat) xidmət haqqı müəyyənləşdirilib.

Bu barədə Gürcüstanın BM.ge nəşri ölkənin Maliyyə Nazirliyinin qərarına istinadən məlumat yayıb.

İndiyədək avtomobillərin təkrar ixracı zamanı Gürcüstan Daxili İşlər Nazirliyinin Xidmət Agentliyinə orta hesabla 600 lari (386 manat) ödənilirdi. Yeni qərarla bu məbləğə Gürcüstanın Gəlirlər Xidmətinə ödəniləcək əlavə 450 lari (289 manat) də qoşulur.

Bir avtomobilin təkrar ixracının rəsmiləşdirilməsi ilə bağlı ümumi xərclər 1050 lariyə (675 manat) çatır.

Yeni qayda gömrük təsnifatının 8703 koduna daxil olan minik avtomobillərinə şamil edilir. Müvəqqəti idxal prosedurundan sonra təkrar ixrac edilən avtomobillər isə bu 450 larilik (289 manatlıq) ödənişdən istisnadır.

Təkrar ixrac necə həyata keçirilir?

Təkrar ixrac xaricdən Gürcüstana gətirilən avtomobilin sonradan başqa ölkəyə satılaraq göndərilməsidir.

Məsələn, ABŞ-dən alınan avtomobil Gürcüstanın Poti limanına gətirilir, burada müvafiq gömrük və satış prosedurlarından keçirilir, daha sonra Azərbaycana və ya digər ölkəyə göndərilir.

Yeni qaydaya əsasən, belə avtomobillərin Gürcüstandan təkrar ixrac kimi rəsmiləşdirilməsi zamanı əlavə xidmət haqqı ödəniləcək. Ödəniş müvafiq xidmət göstərilməzdən əvvəl həyata keçirilməlidir.

Azərbaycana hansı təsiri ola bilər?

Gürcüstan Azərbaycana avtomobil tədarük edən mühüm bazarlardan biridir. Xüsusilə ABŞ və digər ölkələrdən gətirilən işlənmiş avtomobillərin bir hissəsi Gürcüstan üzərindən Azərbaycan bazarına daxil olur.

Yeni rüsum həmin avtomobillərin alış və daşınma ilə bağlı ümumi xərclərini artıra bilər. Əgər əlavə 450 lari (289 manat) xərc satıcı tərəfindən avtomobilin qiymətinə daxil edilərsə, Azərbaycandakı alıcılar da bahalaşma ilə üzləşə bilərlər.

Gürcüstan Avtoidxalçılar və Avtomobil Sahibləri Assosiasiyasının rəhbəri Aleksi Noniadze bildirib ki, yeni ödəniş avtomobil satıcıları və idxalçılar üçün əlavə maliyyə yükü yaradacaq. Onun sözlərinə görə, bazarda rəqabət səbəbindən satıcılar bəzi hallarda bu xərci öz üzərlərinə götürməli olurlar.

Avtomobil ixracında ciddi azalma

Gürcüstanın Milli Statistika Xidmətinin məlumatına görə, 2026-cı ilin ilk doqquz ayında ölkədən 63 min 141 avtomobil təkrar ixrac edilib.

Bu avtomobillərin ümumi dəyəri 1,5 milyard dollar təşkil edib. Ötən ilin müvafiq dövrü ilə müqayisədə ixracın dəyəri 475 milyon dollar və ya 24 faiz azalıb.

Azalmanın qeydə alındığı əsas istiqamətlər arasında Qırğızıstan, Qazaxıstan, Azərbaycan və Tacikistan da var.
 
///Bakupost
OXŞAR XƏBƏRLƏR