Bakı bulvarına yeni əyləncə vasitələri gətirilib. Bu barədə məlumatı ANS PRESS-ə Dənizkənarı Bulvar İdarəsinin rəis müavini Nazim Məcidov verib. 

Onun sözlərinə görə, bunlardan biri faytona bənzər velosipedlərdir. Velosipedlər 3-4 və 6 nəfərlikdir. N.Məcidov hələlik yeni gətirilən faytona bənzər velosipedlərin sayının 10 ədəd olduğunu bildirib. Amma bu tip velosipedlərdən gələcəkdə daha çox gətirilməsi də istisna olunmur.

Velosipeddə 20 dəqiqə gəzməyin qiyməti isə 5 manatdır. İnsanlar onu özləri idarə edir, istədikləri tərəfə gedə bilirlər.

6 nəfərin rahat minə biləcəyi velosipedlərin qarşı tərəfi körpələr üçün nəzərdə tutulub. Hətta uşaqların düşməmələri üçün rezin bağlar da var.

Daha bir yenilik isə suda üzən nəhəng şarlardır. Belə ki, Milli Parkın ərazisində iki yerdə xüsusi hovuzlar quraşdırılıb. Hovuzların hərəsində 5 şar var. Şəffaf materialdan olan böyük ölçülü şarların içinə hava vurulur və içərisinə uşaqlar salınır. Bununla da uşaqlar şarların içərisində - suyun üzərində əylənirlər. 

Hər iki əyləncə vasitəsi Türkiyədən gətirilib. 

Xatırladaq ki, Milli Parkın ərazisində aparılan tikinti işlərinə Sadko və Venesiya kimi tanınan obyektlərin restavrasiyası ilə yekun vurulacaq.