Dünən səhər saatlarında Bakının mərkəzində, Füzuli küçəsində yerləşən daha bir tarixi binanın söküntüsünə başlanılıb.
AZXEBER.COM Müsavat.com-a istinadən xəbər verir ki, söküntü işləri Bakı Şəhər İcra Hakimiyyəti tərəfindən aparılır. Sakinlər yaşadıqları binanın tarixi bir bina olduğunu desələr də, Bakı meriyasından gələn nümayəndələr sakinlərin dediyi ilə razılaşmayıblar.
Onlar bildirdilər ki, bu ərazidə söküntünün ikinci mərhələsi həyata keçirilir. İş icraçıları bildirdilər ki, sökülən binanın sakinləri razılıq əsasında köçürülüblər: “Bina yaşayış üçün tam yararsız idi. Bakı Şəhər İcra Hakimiyyəti tərəfindən sökülməsi qərara alındı. Bina sakinlərinə kompensasiya verilərək köçürülüb. Bu yolun kənarında hasar tikiləcək”.
“Evdə yaşaya-yaşaya binanı sökürlər”
Söküntü işlərinə etiraz edənlər arasında yaxınlıqdakı binanın sakinləri də var idi. Onlar “Yeni Müsavat”a açıqlamalarında bildirdilər ki, binalarında yaşayış olmasına baxmayaraq meriya söküntü işləri aparır. Sahib adlı bina sakininin sözlərinə görə, aparılan söküntü işləri nəticəsində evlərində dərin çatlar yaranıb: “İki gündür nə yediyimizi, nə də içdiyimizi bilirik. Binamızın yarısını söküblər. Biz kompensasiya ilə razılaşmırıq deyə, bu vasitə ilə təzyiq göstərməyə çalışırlar”.
“Vətəndaşlar evlə təmin olunsunlar”
Evindən zorla çıxarıldığını deyən Bəhruz Əliyev adlı bina sakini isə bildirdi ki, üç aydır ki, dövlət orqanlarına məktub yazmaqla məşğuldur: “Sonuncu dəfə prezident İlham Əliyevə şikayət məktubu yazdım. Hələ bir cavab verilməyib. Mənə cəmi 16 min manat pul veriblər. Mən o pula harada ev alım? Yaxşı olardı ki, dövlət layihələri ilə bağlı aparılan köçürülmələr zamanı vətəndaşlar evlə təmin olunsunlar”.
Qeyd edək ki, sökülən binalar bir müddət əvvəl sürüşdürülən tarixi binanın yaxınlığındadır
