Xəbər verdiyimiz kimi, Azərbaycan Xalq Cəbhəsi Partiyasının sədri Əli Kərimlinin evində axtarış aparılıb. Məlumata görə, AXCP sədrinin evindəki axtarış Ramiz Mehdiyevin DTX-də istintaq olunan cinayət işi ilə əlaqədardır.
Deputat Arzuxan Əlizadə AZXEBER.COM-a açıqlamasında deyib ki, bu axtarışın Ramiz Mehdiyev ilə bağlı olması istisna edilmir:
"Bu axtarışın Ramiz Mehdiyev ilə bağlı olması istisna edilmir. Çünki Ramiz Mehdiyevin bir sıra siyasilərlə və əvvəlki dönəmlərdə müxtəlif vəzifələrdə işləyən şəxslərlə əlaqəsi olma ehtimalı böyükdür. Ramiz Mehdiyev barəsində qaldırılan cinayət işindəki maddələri təkbaşına törətmək mümkün deyil. İstintaq dövründə məlum olacaq ki, onunla birlikdə bu cinayətin törədilməsi istiqamətində istər təşkilatçı, istərsə də iştirakçı qismində olan şəxslər var.
Bu şəxslər siyasətçilər də ola bilər, siyasi partiya rəhbərləri arasından da kimlərinsə adı keçə bilər”.
Deputat bildirib ki, istənilən halda cinayət işinin tamamlanmasını və istintaqın nəticələrini gözləmək lazımdır:
"Cinayət işinin tamamlanmasını və istintaqın nəticələrini gözləmək lazımdır. Çünki hər hansı münasibət bildirmək və ya ad çəkmək istintaqa təsir kimi qiymətləndirilə bilər. Buna baxmayaraq, məsələ çox ciddidir və ictimaiyyətin diqqət mərkəzindədir. Araşdırma nəticəsində əlaqəli şəxslər və gözlənilməz adlar da ortaya çıxa bilər. Necə olursa olsun, hər kəs öz hüquqi cəzasını almalıdır. Çünki söhbət dövlətə xəyanət maddəsindən gedir və əvvəlki xidmətlərindən asılı olmayaraq, başqa dövlətin maraqlarına xidmət etmək, ölkə daxilində konstitusiyaya zidd şəkildə hakimiyyəti ələ keçirməyə cəhd göstərmək ağır dövlət cinayətidir”.
Şahanə Ziyad
