‘Digər xərclər’Eurovision’ üçün deyil, əhalinin rifahının yaxşılaşdırılması üçündür’

Azərbaycan dövləti Bakıya gəlmiş bütün qonaqların təhlükəsizliyinə tam təminat verir. Trend-in məlumatına görə, bunu bazar ertəsi "Eurovision 2012"-yə həsr olunmuş mətbuat konfransında Azərbaycan Prezidenti Administrasiyasının İctimai-siyasi məsələlər şöbəsinin müdiri Əli Həsənov bildirib. "Azərbaycan hakimiyyəti ölkənin ictimai-siyasi təhlükəsizliyi ilə bağlı bütün qabaqlayıcı tədbirləri görüb. Biz bunu yalnız "Eurovision" üçün deyil, il boyu öz vətəndaşlarımızı qorumaq üçün görürük, lakin "Eurovision" mahnı yarışması zamanı xüsusi gücləndirilmiş təhlükəsizlik tədbirləri görülüb", - Həsənov deyib. PA rəsmisi qeyd edib ki, dövlətimiz bütün sahələrdə bu yarışmaya ciddi hazırlaşıb, bütün lazımi tədbirləri görüb. "Bütün müvafiq qurumlar, bütün nəqliyyat infrastrukturu tam hazır vəziyyətə gətirilib və yarışmanın başlamasına hazırdır", - Həsənov deyib. PA rəsmisi Azərbaycan bayrağının üzərində "Eurovision-2012" sözlərinin yazılması məsələsinə də münasibət bildirib. O qeyd edib ki, bu, normal hal deyil. "Satış köşklərində bayrağın belə sözlər yazılmış halda satılması yolverilməzdir. Bu məsələyə Standarlaşdırma, Meteorologiya və Patent üzrə Dövlət Komitəsi də münasibət bildirib. Konkret desək, bu, cinayət deyil, sadəcə qəbahətdir. Amma gələcəkdə cinayət məsuliyyəti də nəzərdə tutula bilər", - Həsənov vurğulayıb. PA rəsmisinin sözlərinə görə, "Eurovision" mahnı müsabiqəsi ilə bağlı Bakı şəhərinə bu günlərdə 20 minə yaxın qonaq gəlib. Həsənov jurnalistlərin suallarını cavablandırarkən qeyd edib ki, "Eurovision" mahnı müsabiqəsinə Azərbaycan dövlətinin ayırdığı maliyyə vəsaiti şəffaf şəkildə göstərilir. Onun sözlərinə görə, müsabiqəyə 50 milyon manat xərclənilib. "Digər xərclər - "Bakı Kristal Zal"ının tikintisi, yolların, dənizkənarı parkın abadlaşdırılması və sair "Eurovision" üçün deyil, əhalinin rifahının yaxşılaşdırılması üçündür", - o deyib.